Crystal Palace pret kampionin e Premier League, Arsenalin, në ndeshjen e fundit të sezonit, teksa të dyja skuadrat po menaxhojnë ngarkesën para finaleve evropiane të javës së ardhshme.

Crystal Palace nuk mund të përfundojë më lart se vendi i 14-të në tabelë, ndërsa trajneri në largim Oliver Glasner ka konfirmuar se do të menaxhojë minutat e lojtarëve para finales së parë evropiane të klubit, ndaj Rayo Vallecanos në UEFA Conference League.

“Shqiponjat” nuk kanë fituar në gjashtë ndeshjet e fundit të kampionatit, me tri barazime dhe tri humbje, por mbeten të pamposhtura në “Selhurst Park” në Premier League që nga shkurti.

Arsenali, ndërkohë, i dha fund pritjes 22-vjeçare për titullin kampion, pasi barazimi 1-1 i Manchester Cityt ndaj Bournemouthit i siguroi skuadrës së Mikel Artetës triumfin në Premier League.

“Topçinjtë” do ta luajnë këtë sfidë pa presion, por me synimin për të ruajtur ritmin para finales së Ligës së Kampionëve kundër PSG-së. Arsenali vjen pas katër fitoreve radhazi në kampionat pa pësuar gol dhe kërkon ta zgjasë këtë seri edhe në javën e fundit.

Historiku flet qartë në favor të Arsenalit, që ka fituar tetë nga nëntë përballjet e fundit me Crystal Palace. Londinezët kanë triumfuar edhe në tri vizitat e fundit në “Selhurst Park”, dy herë duke mbajtur portën të paprekur.

Te Palace, Ismaïla Sarr mbetet lojtari më në formë, pasi ka shënuar në tri nga katër ndeshjet e fundit. Për Arsenalin, Kai Havertz po kalon një moment pozitiv, me dy gola dhe një asistim në katër paraqitjet e fundit.

Crystal Palace humbi Chadi Riad dhe Chris Richards për shkak dëmtimesh ndaj Brentfordit, ndërsa te Arsenali mungojnë Jurriën Timber dhe Ben White./Express

Burimi: 04online