Ekziston një lidhje e drejtpërdrejtë dhe shumë komplekse midis zemrës dhe trurit. Pas një ataku në zemër, truri aktivizon qarqe specifike nervore për të përshpejtuar rigjenerimin e indeve.

Ky zbulim i fundit nga shkencëtarët në Universitetin e Kalifornisë, San Diego, i botuar në revistën prestigjioze “Cell”, sugjeron se truri dhe zemra “flasin” vazhdimisht me njëri-tjetrin përmes një dialogu që mund të frymëzojë terapi të reja revolucionare.

Ne e dimë prej kohësh se këto dy organe nuk funksionojnë të izoluara, por bashkëpunojnë në procese jetike si rregullimi i presionit të gjakut. Megjithatë, studimi i ri zbuloi se pas një ataku kardiak, zemra mbështetet te një aleat i besueshëm.

Truri mbledh sinjale të dërguara nga një grup i vogël neuronesh shqisore të vendosura brenda vetë zemrës, një koleksion qelizash që shpesh quhen “një tru i vogël”.

Për ta kuptuar këtë proces, kërkuesit studiuan zemrën e miut përmes teknikave që e bëjnë indin transparent. Analiza zbuloi një grup të panjohur neuronesh që buronin nga nervi vagus dhe mbështilleshin rreth murit të barkushes së dëmtuar.

Kur ndodh një infarkt, këto fibra nervore shtohen dhe dërgojnë sinjale në rajonet e trurit që merren me stresin, duke shkaktuar një përgjigje “lufto ose ik”. Kjo e fundit stimulon sistemin imunitar të dërgojë qeliza në zonën e dëmtuar për të formuar një ind shtesë.

Ndonëse ky proces është i domosdoshëm për riparimin, pavarësisht nëse zgjat shumë ose është i tepërt, ai përfundon duke e dëmtuar funksionin e muskulit të zemrës.Shkencëtarët zbuluan se duke bllokuar përkohësisht këto sinjale me një “çelës” gjenetik, mund ta ndalonin që herët përgjigjen imunitare, duke kapur vetëm aspektet pozitive të shërimit.

Si rezultat, zona e dëmtuar tkurrej më shpejt dhe zemra shërohej me efikasitet më të lartë. Ky zbulim jo vetëm që hap rrugën për trajtime të reja, por shpjegon edhe arsyen pse disa bllokues beta funksionojnë mirë pas infarktit, duke ndërhyrë pikërisht në këtë lak komunikimi midis sistemit nervor dhe atij imunitar. /tesheshi.com/

Burimi: tesheshi