Prizren Post - Nga qendra e Ballkanit!

Kosova ende nuk është pjesë e OBT-së, edhe pas tetë vjet shtet

Prizren Post | 12:49 - 28.02.2016

Kosova edhe pas 8 vjet shtet ende nuk ka arritur që të anëtarësohet në Organizatën Botërore për Tregti (OBT), ndonëse shteti ynë në shumicën e institucioneve financiare ndërkombëtare është bërë anëtare me të drejta të plota.

Rëndësia e anëtarësimit në OBT është mjaft e madhe dhe e domosdoshme, meqë Kosova ka një deficit të lartë tregtar. Ka pasur premtime të mëdha nga qeveritë e kaluara dhe kjo e fundit se anëtarësimi në këtë organizatë botërore do të ndodhë shpejt, por kjo një gjë e tillë nuk shihet të jetë afër.

Zyrtarë të Ministrisë së Tregtisë dhe Industrisë thonë për KosovaPress se anëtarësimi në OBT duhet të kërkojë angazhim më të madh për shkak që është një organizatë më gjigante sesa CEFTA dhe MSA -ja.

OBT-ja, sipas tyre, do të ndihmonte edhe në shtimin e vëllimit të shkëmbimeve tregtare, gjë që ndihmon në liberalizimin e mëtejmë të tregtisë.

Udhëheqësja e Departamentit të Tregtisë në kuadër të Ministrisë së Tregtisë dhe Industrisë (MTI), Sytrime Dervisholli për KosovaPress thotë se MTI ka hartuar draftin e parë të memorandumit mbi Regjimin e Tregtisë së Jashtme, ku së shpejti pritet edhe finalizimi i tij.
Ky dokument, sipas saj është si hapi fillestar për anëtarësim në OBT dhe pasqyron politikat ekonomike dhe tregtare të Kosovës. Dervisholli beson se anëtarësimi në OBT do të ndodhë në këtë vit.

“Ministria e Tregtisë ka hartuar memorandumin fillestar që është mbi regjimin e tregtisë së jashtme, që është edhe dokumenti fillestar për anëtarësim në OBT. Ky dokument përfshinë politikat tregtare dhe ekonomike të një vendi dhe pas përfundimit do të dërgohet në OBT për votim. Pas kësaj do të dërgohet në Këshillin e përgjithshëm të OBT-së, ku do të themelohet një Grup Punues për vlerësimin e këtij dokumenti, pasi të merr vlerësimin pozitiv do të jepet sinjali fillestar për t’u anëtarësuar Kosova në këtë organizatë. Shpresoj që një hap i tillë të ndodhë gjatë këtij viti pa dashur me jep premtime të mëdha, por që MTI veç ka filluar të punoj në këtë drejtim”, thotë Dervisholli.

Ajo më tej shtoi se Qeveritë e kaluara sigurisht se kanë pasur agjendat e tyre, por Dervisholli beson se OBT-së i ka ardhur fundi të trajtohet seriozisht nga institucionet e Kosovës dhe këtë është duke e bërë MTI, respektivisht departamenti i Tregtisë që është përgjegjës për monitorimin dhe zbatimin e marrëveshjeve tregtare.

Rëndësia e kësaj organizate për Dervishollin është integrimi i Kosovës në tregtinë globale dhe harmonizimi i standardeve, kritereve dhe procedurave me ato të OBT-së. Po ashtu, anëtarësimi në OBT, ndihmon liberalizimin sa më të thellë dhe të gjerë të shkëmbimeve tregtare që qojnë në një konkurrencë të fortë dhe të ndershme.

“Anëtarësimi në OBT do të kërkoj angazhim më të madh për shkak që është një organizatë më gjigante sesa CEFTA dhe MSA -ja. Gjithashtu, OBT-ja do të ndihmonte edhe në shtimin e vëllimit të shkëmbimeve tregtare gjë që ndihmon liberaliz imin e mëtejmë të tregtisë. Pa dashur të ndalemi vetëm te kjo tregtia klasike… Kosova do të krijonte një pasqyrë të mirë në anëtarësimin në OBT për tërheqjen e investimeve të huaja”, tha Dervisholli.
Ajo tha se Kosova qe sa vite vuan nga një deficit tregtar, prandaj Organizata Botërore e Tregtisë do të ndihmojë Kosovën në këtë drejtim.

Nënkryetarja e Komisionit parlamentar për Buxhet dhe Financa, Safete Hadergjonaj për KosovaPress mendon se mos anëtarësimi në OBT është një e metë e shtetit tonë, sepse sipas saj, Kosova duhet të bëjë përpjekje më të mëdha dhe më të fuqishme që të jetë edhe pjesë e kësaj organizate botërore.

“Ajo që duhet vlerësuar, është që jemi pjesë e shumë organizatave qoftë atyre ndërkombëtare që kanë të bëjnë me instrumente të ndryshme financiare. Këtu është një kontribut shumë i rëndësishëm për vendin tonë, mirëpo ende nuk jemi pjesë e Organizatës Botërore për Tregti.

Mendojë që kjo është një deficit nga ana e Kosovës, sepse Kosova duhet të bëjë përpjekje më të mëdha dhe më të fuqishme që të jetë edhe pjesë e kësaj organizate botërore”, thotë Hadergjonaj.
Për zvarritjen e anëtarësimit në OBT, deputetja e Kuvendit të Kosovës thotë se institucionet e Kosovës janë të penguara të marrin vendime, me veprimet të cilat po bëhen sidomos nga ana e opozitës. Kjo sipas saj ka ngecë në vend funksionimi institucional. Po ashtu, ajo tha se me këto ngecje po jepen mesazhe negative te ndërkombëtarët që të ecet me hapa pozitiv në drejtim organizatave, mekanizmave të ndryshëm institucional dhe të vendeve të ndryshme ndërkombëtare.
Edhe njohës të çështjeve ekonomike vlerësojnë se Kosova do të ketë disa përparësi në anëtarësimin e saj në OBT, por që anëtarësimi i jep Kosovës edhe përgjegjësi.

Sa i përket anëtarësimit në Organizatën Botërore të Tregtisë, ndoshta përparësia dhe e mira që do të përfitonte Kosova është se do të bëhet pjesë e një grupi shumë të madh të vendeve me të cilat mund të inkuadrohet në garën për relacionet tregtare globale. Mirëpo është edhe një çështje tjetër që mund të paraqitet edhe si përgjegjësi dhe detyrim i Kosovës, respektimi i kritereve dhe standardeve mbi të cilat bazohet në raporte dhe zhvillimi i relacioneve në tregtinë globale./Kp/


Etiketa:
Arivisti Company