Mitrovicë – Në mbledhjen e rregullt të Bordit të Drejtorëve, kryesuar nga kryetari i Komunës, Agim Bahtiri u diskutua çështja e rivarrimit të eshtrave të heroit, Isa Boletini që do të mbahet më 10 qershor.

Kryetari Bahtiri, tha se nga 6 qershori qyteti i Mitrovicës do të ketë festë, për çka ka kërkuar angazhim nga drejtoria e kulturës, ndonëse sipas tij, për përgatitjet dhe ecurinë e të gjitha aktiviteteve të Komunës, që do të mbahen lidhur me rivarrimin e eshtrave të Isa Boletinit, do të formohet një këshill organizativ.

Ai po ashtu e njoftoj bordin për takimin që do të mbahet të enjten me nivelin qendrorë lidhur me këtë ngjarje.

Drejtori i Drejtorisë së Ambientit, Enver Uka, tha se janë bërë të gjitha përgatitjet për shënimin e 22 Prillit – Ditës së Tokës, me ç’rast me angazhimin edhe të nxënësve të shkollave të kësaj komune, do të bëhet pastrimi i qytetit, si dhe pastrimi i ambientit përskaj rrugës magjistrale, duke nisur nga fshati Kçiq.

Njëherësh, Uka njoftoj se një ditë më parë është zhvilluar aksion për pastrimin e Lagjes së Romëve, ku është larguar një sasi e madhe e mbeturinave.

Drejtoresha e Arsimit, Ajmane Barani, njoftoi se shumë shpejt do të fillojë ndërtimi i shkollës në Lagjen Bajr, si dhe rregullimi i oborrit të shkollës në Zhabar. Ajo përmendi edhe renovimin e një klase në shkollën e fshatit Kaqandoll.