Prizren Post - Nga qendra e Ballkanit!

Mosvotimi i Gjykatës-goditje për marrëdhëniet me SHBA dhe BE

Prizren Post | 10:26 - 27.06.2015

New York – Gazeta The New York Times boton informatën e Associated Press mbi votimin në Parlamentin e Kosovës për amendamentet Kushtetuese që do të mundësonin krijimin e Gjykatës Speciale.

Gazeta The New York Times boton informatën e agjencisë amerikane të lajmeve, Associated Press mbi votimin në Parlamentin e Kosovës për amendamentet Kushtetuese që do të mundësonin krijimin e Gjykatës Speciale për të gjykuar krimet e luftës ‘përfshi vrasjen qindra civilëve serbë.’

“Rezultati i votimit ishte një goditje për marrëdhëniet e Kosovës me mbështetësit e saj ndërkombëtarë, Shtetet e Bashkuara dhe Bashkimin Evropian,” shkruan The New York Times.

Kanali televiziv ABC që merr informatën e agjencisë Reuter, njoftonte se ‘ligjdhënësit e Kosovës refuzuan të premten trysninë e Perëndimit për krijimin e Gjykatës speciale.’

“Votimit në Parlament i munguan pesë vota për miratim, dhe kjo përbën mospërfilljen më të madhe të Kosovës ndaj mbështetësve më të mëdhenj të saj, politik dhe financiar, Shteteve të Bashkuara dhe Bashkimit Evropian, të cilët lobuan shumë në mënyrë që shteti i ri i Kosovës të adresojë akuzat,” theksonte ABC. Më tej në këtë informatë thuhej se ‘SHBA dhe BE kanë tërhequr vërejtjen se dështimi i Kosovës për të krijuar Gjykatën rrezikon që çështjen ta marrë Këshilli i Sigurimit i Kombeve të Bashkuara me përfshirjen e pashmangshme të Rusisë si aleat i madh i Serbisë, e cila e kundërshton pavarësinë e Kosovës./rtk/


Etiketa:
Arivisti Company