Armëpushimi i papritur midis Iranit dhe Shteteve të Bashkuara, i ndërmjetësuar nga Pakistani dhe i mbështetur nga Izraeli, i ka dhënë fund përkohësisht Luftës së Tretë të Gjirit.

Ky zhvillim, ka sjellë menjëherë atë që Uashingtoni nuk e arriti dot me forcë: mundësinë për rihapjen e Ngushticës së Hormuzit për trafikun tregtar dhe energjetik.

Ky korridor jetik, i cili ishte bllokuar nga kërcënimet e Teheranit, pritet tashmë të kthehet në normalitet, duke larguar hijen e një kolapsi energjetik global që po trembte qeveritë më të fuqishme të botës.

Reagimi i bursave ndaj këtij lajmi ishte i rrufeshëm në sensin pozitiv. Nafta bruto Brent pësoi një rënie të menjëhershme prej pesëmbedhjetë përqind, duke zbritur me shpejtësi nën pragun psikologjik prej njëqind dollarësh dhe duke u stabilizuar rreth nëntëedhjetëetre dollarëve për fuçi.

Ky është niveli më i ulët i regjistruar në muajin e fundit, duke përmbysur trendin rritës të 7 prillit ku çmimet kishin kaluar mbi njëqind e dhjetë dollarë.

Analistët vlerësojnë se kjo tendencë do të vazhdojë, pasi pasiguria gjeopolitike po zëvendësohet nga shpresa për një paqe të strukturuar.

Edhe në tregun amerikan situata është reflektuar me të njëjtin ritëm, ku çmimi i naftës bruto ka rënë ndjeshëm dhe treguesit e benzinës parashikojnë ulje të përditshme prej dhjetë për qind.

Ndërsa bota po përfiton nga kjo rënie e ndjeshme, në Shqipëri sytë janë kthyer nga Bordi i Transparencës dhe lëvizjet e dyshimta të tregut vendas.

Përvoja e hidhur e viteve të fundit ka treguar se mekanizmat e kontrollit shpesh funksionojnë me dy standarde, duke lënë hapësirë për abuzime që rëndojnë drejtpërdrejt mbi xhepat e qytetarëve shqiptarë, të cilët paguajnë ndër çmimet më të larta në rajon.

Në vendin tonë, biznesmenët e karburanteve janë bërë protagonistë të një fenomeni të turpshëm: spekulimit me krizat. Ata janë të parët që reagojnë me shpejtësi rrufe sapo dëgjojnë për një rritje qoftë edhe minimale në bursa, duke i ndryshuar tabelat e çmimeve brenda natës.

Por, sapo bursa ndërkombëtare pëson rënie, siç po ndodh aktualisht me naftën Brent, ata janë të fundit që ulin çmimet, duke u fshehur pas justifikimeve për “stokun e vjetër” të blerë shtrenjtë.

Ky paradoks tregtar nxjerr në pah paaftësinë ose mosdëshirën e Bordit të Transparencës për të mbrojtur konsumatorin.  Prandaj qytetarët vazhdojnë të presin me skepticizëm nëse kjo ulje do të reflektohet realisht në pikat e karburantit, apo nëse spekulimi do të gllabërojë edhe këtë herë frymëmarrjen që po vjen nga stabilizimi i gjeopolitikës globale. /tesheshi.com/

Burimi: tesheshi