Prizren Post - Nga qendra e Ballkanit!

Rama: Do ndërhyjmë në Lazarat

Prizren Post | 08:20 - 21.05.2014

Droga, korrupsioni, shërbimi i keq në spitale, ekonomia e dobët, pronat e pakthyer të ish-pronarëve nuk janë probleme që lindën pas 23 Qershorit, por janë cështje të trashëguara ndër vite.

Qeveria po punon, por kryeministri nuk është magjistar të bëjë ndryshime për një ditë. Kështu u shpreh kryeministri Edi Rama në intervistën këtë mbrëmje të marte me Eni Vasilin në “Studio e Hapur”, të ekranit në News24.

Rama u pyet rreth rolit të opozitës sot, si e sheh Lulzim Bashën në rolin e kryebashkiakut e kryetarit të opozitës, mbi reformat, ato në drejtësi, territorialen, mbi drogën dhe avionin. Cështja e avionit, Rama komentoi sulmet e ashpra të opozitës por u ndal dhe tek kërkesa e deputetit socialist Blushi mbi Lazaratin dhe statusin e PS.

Eni Vasili: Ditën e premte opozita ka paralajmëruar një tjetër protestë që pason atë të së enjtes. Ndryshe nga sa jemi mësuar kemi parë edhe disa deputetë të maxhorancës që bëjnë thirrje për protestë. E kuptoj që keni zgjedhur sarkazmën. Nuk e di pse e keni zgjedhur këtë mënyrë? Si e shihni ju si kryeministër këtë situatë të nxehtë politike?

Edi Rama: Debati në këtë rast është mes partive. Nuk është mes qeverisë dhe opozitës. Opozita ka të drejtën e vet të bëjë çdo zgjedhje të gabuar që dëshiron. Unë kam vetëm keqardhje për opozitën. Për të tjerat debate bëhet mes partive.

Eni Vasili: Në fakt opozita kërkon dorëheqjen tuaj si kryeministër, jo si kryetar i PS-së..?

Rama: Kjo e shton keqardhjen time

Eni Vasili:Në një nga ligjërimet e fundit politike ju e quajtët opozitën një grup pushtetarësh të bërë tapë nga humbja e 23 qershorit dhe deklarimet i quajtët gënjeshtra, shpifje… A nuk është një gjuhë e ashpër për t’ju drejtuar opozitës..?

Rama:Besoj se asnjëhera nga ato që ju cituat nuk përkon përveçse me të vërtetën. janë të vërteta. Janë realisht një grup pushtetarësh të bërë tapë, që pas humbjes dhe që ende janë në avujt e një pijeje që s’ju ka dalë akoma që quhet pushtet I degraduar si ishte ai para 23 qershorit dhe për të cilin morën atë që merituan pas 23 qershorit. Kështu që me shumë keqardhje, po sot që flasim në rrugën tonë drejt Shqipërisë evropiane kemi një opozitë që s’ka asgjë evropiane.

Eni Vasili:Si e shihni veten tashmë të ulur në poltronin e kryeministrit, në parlament. Përballë keni ish-kryeministrin Berisha, ish-kryetaren e Kuvendit, kryetari i opozitës mungon, është kryebashkiak. A ju kujton kjo vehten?

Rama:Jo vehten nuk e shoh. Ata i shoh dhe i shoh me keqardhje dhe e përsëris, sepse besoj sot janë kushtet për të patur një komoditet që ne nuk e kishim kur ishim në opozitë. sepse hapësira që është sot në Parlament është sot një hapësirë që shkon përtej edhe rregullores së Parlamentit, sepse mundësia e opozitës për të mbajtur gjithë qëndrimet e saj është e plotë, sepse ekranet që opozita ka në shërbim janë absolutisht të pacënuara nga ansjë lloj zhurmuesi të natyrës politike. sepse në fund të fundit është shumë herët për të bërë çfarëdo qoftë tjetër përveçse për të marrë kohë dhe për të ndërtuar nga gërmadhat e 23 qershorit PD-në. Mirëpo të gjitha këto nuk ndodhin. E kundërta ndodh që kemi përballë një grup njerëzish që duan ti budallepsin shqiptarët dhe ti marrin për budallenj dhe të bëjnë sikur nuk kanë qenë këtu përpara, sikur problemet kanë lindur kur ata u larguan nga qeveria. Sikur Shqipërinë e mbërthyen çështje që në fakt e mbajnë mbërrthyer prej vitesh dhe që kanë filluar të çlirohen pas 23 qershorit.

Eni Vasili:Duket sikur nuk po e merrni shumë seriozisht opozitën. Gjithçka nisi me trafikun e drogës, avionit në Divjakë, ju akuzoi se ju favorizoni trafikun e drogës. Në fillim ju i quajtët qesharake…

Rama:Dhe janë qesharake

Eni Vasili:I quajtët mushkonja… dhe një mushkonjë ra në Divjakë. Kishin të drejtë?

Rama:Unë do të përsëris të njëjtën përgjigje që kam dhënë edhe përpara se të binte një avion në plazhin e Divjakës, kur nga opozita u pretendua që ka një linjë të rregullt ajrore që çdo natë në orën 8 ngrihen avionë nga Divjaka. Dhe e vërteta është që çdo natë në orën 8 ka mushkonja. Ishte një koençidencë që lidhi dy gjërat dhe nuk ka asgjë për të korrigjuar në asgjë nga sa thashë. Edhe sot po të ma përsërisin akuzën se çdo natë nga Divjaka ngrihen avionë apo se ka një linjë që funksionon nga Divjaka lart e poshtë e poshtë e lart, mendoj se ka një problem mjaft serioz me mushkonjat dhe ne gjëja që po bëjmë është që po dezinsektojmë Divjakën dhe gjithë bregdetin pas 23 vjetësh që nuk ka dezisektim dhe që fatkeqësisht ka bërë që në Shqipëri në shumë zona sezoni i pushimit të jetë në shoqërinë e mushkonjave dhe të plehrave për të cilat po ashtu po merremi shumë seriozisht dhe këtë verë besoj se do kemi plazhet më të pastra qysh se nuk mbahet mend.

Eni Vasili:Problem është trafiku i drogës. Ju e quani koincidencë atë që ndodhi, ishte ironi, qëndrimi juaj lidhur me avionin në Divjakë?

Rama:Unë s’akuzova askënd për komplot. Unë thashë që e gjitha u shfaq si në një film, sepse ata u hodhën përpjetë dhe thanë që s’e kemi bërë ne, s’e kemi bërë ne. kjo është punë e tyre. Unë I qëndroj asaj që thashë, ndërkohë që trafiku i drogës, më falni po Shqipëria e ka patur këtë problem, siç ka patur problem korrupsionin, krimin e organizuar prej shumë vitesh dhe ky problem është agravuar jashtëzakonisht shumë në vitet e fundit. Kështu që ne nuk kemi bërë asgjë tjetër, përveçse kemi zhvilluar dhe po zhvillojmë një luftë shumë më të fortë dhe më me shumë rezultat kundër trafikut të drogës, kundër korrupsionit, krimit të organizuar dhe kështu me rradhë.

Eni Vasili:Si më të fortë, sa më të fortë? Pse keni këtë ide, sepse dakord ka patur trafik droge, ka patur korrupsionin, po për këto arsye Partia Demokratike është sot në opozitë..? Përgjegjësinë sot e keni ju.

Rama:E kam këtë ide, sepse në harkun kohor përshembull të 3 muajve ne kemi kapur 5-fishin e sasisë së drogës së kapur në 10 muajt e fundit të qeverisjes paraardhëse. E kam këtë ide sepse nuk ka asnjë krahasim në shifra mes kapjeve dhe ndalimeve që ka bërë policia për drogë apo për kriminelë në kërkim ndërkombëtar apo për kriminelë të kategorive të ndryshme krahasuara me të njëjtën periudhë të qeverisjes së tyre. Ju e patë sot pati dy ngjarje shumë të rëndësishme në këtë luftë, qoftë në luftën kundër drogës, qoftë në luftën kundër për të demilitarizuar një shoqëri që në segmente të saj është shumë e demilitarizuar dhe u kap një sasi shumë e konsiderueshme C4, apo e harruat. Fakti që tritoli ndihet më pak, ka të bëjë me diçka nuk besoj se kjo vjen dhe ikën si me stinë. Ka të bëjë me luftën që bën policia e shtetit dhe kthimin e policisë së shtetit në detyrë. Droga kapet më shumë sepse ka më shumë luftë. Ju si mendoni se meqë është kapur më pak drogë më parë, ka patur më pak drogë?

Eni Vasili:Po kapet edhe rreth nesh më shumë. Kjo do të thotë se edhe policitë e tjera po punojnë më shumë?

Rama:Faleminderit për pyetjen, por sepse e kam theksuar se janë rivendosur lidhjet e këputura mes policive. për fat të keq në dy apo tre vitet e fundit deri në 23 qershor lidhjet e bashkëpunimit mes policive, Shqipëria me fqinjët kanë qenë pothuajse inekzistente sepse operacionet e përbashkëta janë dekonspiruar dhe kanë dështuar për faj të palës tonë. Dhe ky është fakt, dhe nga bashkëpunimi ju e patë vetë. Mund ti referoni deklaratës para meje. Dhe është turp për ne si vend. Detyrohet qeveria gjermane, përmes ambasadës të bëjë një deklaratë për të sqaruar një shpifje monstruoze të bërë nga ana e opozitës që sigurisht në rastin e qeverisë gjermane që nuk ishte sqarim në raport me opozitën, por me opinionin publik dhe ishte shumë e qartë se nga bashkëpunimi mes dy policive dhe nga bashkëpunimi me sautoriteteve të dy anëve është realizuar ndalimi dhe pastaj edhe çmontimi i një linje droge që vinte nga Shqipëria.

Eni Vasili:Ky lloj bashkëpunimi ka çuar edhe në kapjen e drogës edhe në Fjumiçino dhe në Selanik apo ishte një kapje normale..? Pse s’i kapim këtu brenda po i lemë të ikin jashtë?

Rama:Po ju përsëris që shumë punë që ka të bëjë me drogën, jo vetëm tek ne, sepse ne flasim për një avion që ra në Divjakë, por askush nuk merret, po ky avioni nga u nis. Po mirë këta avionë që vijnë e ikin ku ndalojnë, ku shkojnë? Pra luftë ndaj trafikut të drogës apo me krimin e organizuar është gjithnjë e më shumë një luftë ndërkufitare, është një luftë gjithmonë e më globale, sepse krimi është gjithmonë e më global. Dhe të jeni e sigurtë që kjo është edhe arsyeja që sa më shumë të bashkëpunojnë policitë mes tyre, aq shumë do të kenë rezultate, brenda territorit të tyre, sepse kjo lidhet me informacionin. Kjo nuk është thjeshtë çështje te kufiri, e kape te kufiri apo të iku nga kufiri, sepse e përsëris sot unë lexoja një artikull në “Corriere de la Sera” që ma kishin dërguar nga kabineti i ministrit të Brendëshëm dhe ishte shumë e qartë që bëhej fjalë për linja mes shumë shteteve ku qarkullon droga dhe lufta ndaj këtyre linjave, flasim për linja ajrore, bëhet nga të gjitha vendet, përfshirë edhe vendet që ne na duket sikur s’kanë asnjë problem të tillë.

Eni Vasili:Vazhdoj të jem e paqartë për qëndrimin tuaj në lidhje me avionin e Divjakës. Koençidencë?

Rama:Jo koençidenca ishte që në Divjakë ka një problem shumë të madh me mushkonjat dhe kur u ngrit çështja e linjës ajrore që funksionon çdo natë, përgjigja më e natyrshme që mund të vijë, aq e natyrshme sa që na erdhi në të njëjtën kohë dhe mua, edhe kryetarit të Kuvendit.

Eni Vasili:A ishin koençidencë akuzat e opozitës se ju kishit dijeni për një trafik të tillë qoftë edhe përmes strukturave të Forcave të Armatosura?

Rama:Ka një dallim shumë serioz mes nesh dhe atyre, edhe në këtë pikë. Ata kanë qenë në qeveri. Dikush ka qenë kryeministër, dikush ka qenë Ministër i Brendëshëm, nuk po flas për dikë tjetër që ka qenë në krye të Parlaentit dhe s’ka kuptuar gjë hiç për vite me rradhë. Po flas për ata që kanë qenë në qeveri dhe e dinë shumë mirë si funksionon shtetit, si funksionojnë strukturat. Brenda shtetit dhe si funksionon informacioni i klasifikuar. Informacioni i klasifikuar është një lloj informacioni që nuk është për konsum publik. Është ligjërisht e ndaluar që ta konsumosh publikisht dhe për më tepër pastaj kur është fjala për qeverinë dhe për strukturat, ky është një informacion i domosdoshëm për të bërë hetime dhe për të çuar përpara një punë e cila është e lidhur me sekretin. Kështu që informacion mbi bazën e fateve të paprovuara ka patur jo më parë, por ka patur edhe shumë kohë më parë, lidhur me këtë. Pra, nuk daton sot, mirëpo ne përshembull nuk e kemi marrë atë informacion të shumë kohëve më parë dhe unë këtë e kam thënë edhe para pak ditësh për t’jua hedhur në fytyrë atyre që kemi përballë dhe për t’ju thënë që kujt ja tregoni këto copa informacioni që i manipuloni për publikun?! Ndërkohë që ju e dini shumë mirë që këtë informacion e keni patur ju në tavolinë dhe mbi bazën e këtij ifnroamcioni është vazhduar të hetohet nga strukturat. Mbi bazën e këtij informacioni ka punuar shërbimi secret apo shërbimet e tjera, por nuk ka patur asnjë fakt të provuar. Pra, ne nuk kemi qenë dhe nuk jemi në dijeni të asnjë fakti të provuar. Pra, është shumë e thjeshtë.

Eni Vasili:Po indicie kishit, për shkak të letrës që më pas doli edhe nga SHISH…

Rama:Edhe një herë tjetër, indiciet që janë dyshime të arsyeshme siç i konsideron shërbimi sekret, në informacionet e klasifikuara nuk janë të publikueshme dhe as të komentueshme për publikun. Nuk e bën asnjë lloj qeverie në botë, qeveri normale, kuptohet, dhe për më tepër nuk vlejnë si fakte, sepse e vetmja gjë që sjellin kur komentohen dekonspirojnë çfarëdo gjëje që ti bën.
E kam fjalën nga pikpamja etike, nga pikpamja ligjore po e po, por këtu nuk ka pyetur njeri në këtë aspekt.

Eni Vasili:Dakord zoti Kryeministër, por tani jemi përballë një fakti, avioni i Divjakës…

Rama:Po edhe çfarë fakti..?

Eni Vasili:Pyetja është kjo, kanë lidhje akuzat e opozitës gjatë gjithë kohës, Gjadri, Kardhiqi, Divjaka,… etj. A duhet t’i kishit marrë më seriozisht?

Rama:Çfarë të bëjmë?!

Eni Vasili:Ta kishit parandaluar

Rama:Ça të parandalojmë?

Eni Vasili:Trafikun e drogës…

Rama:Edhe një herë po ju them që ne e kemi marrë shumë seriozisht luftën kundër drogës në të gjitha aspekte. I kemi marrë seriozisht edhe këto indicie, por po ju përsëris që në këtë rast çfarë duhet të merrnim seriozisht ne. Në këtë rast avion është parë pa u ulur nga informatorët përkatës që kanë informuar policinë pa u ulur avioni dhe kjo ka qenë shumë e qartë në të gjithë historinë e rindërtuar nga policia e shtetit me ekspertët e huaj që tregon që nga fillimi deri në fund gjithçka ka qenë nën kontroll. Është parë avioni dhe pastaj fakti që avionic ra është përgjegjësi e policië, është përgjegjësi e qeverisë?! Këtu jemi përpara një situate që vetëm në Shqipëri mund të marrë këto përmasa dhe vetëm e yshtur nga forca tërësisht qesharake që marrin përsipër ti japin përmasa të tilla një ngjarjeje që është mbyllur plotësisht. Është kapur piloti, është kapur ai tjetri që do ta çonte me makinë, është kapur droga, është kapur makina, ka filluar një hetim.

Eni Vasili:Janë kapur rastësisht…?

Rama:Më vjen shumë keq. Edhe një herë tjetër po ju them. Policia ka qenë aty dhe informatori ka dhënë informacionin kur avioni nuk ishte ulur. Tani të hyjmë të bëjmë një bisedë a do kapej nëse avioni s’do kishte ngecur, a do kapej makina a s’do kapej makina, etj. Këto janë muhabete kot. Unë di vetëm kaq, që policia nuk është kapur nga asnjë lloj befasie nga ardhja e avionit. Ky është fakt, sepse nga e ka marrë informacionin policia, kur avioni ka qenë në ajër.

Eni Vasili:E ka marrë nga strukturat… Ministri juaj tha që ne e prisnim, por diku më tej…

Rama:Ministri nuk tha që ne e prisnim avionin. Ministri e ka thënë që prej shumë kohësh, si në atë pikë, si në pika të tjera ka patur sistem të ngritur policie pikërisht sepse e kemi marrë shumë seriozisht këtë punë. Nuk ka thënë ministri që prisnim avionin. Prisnim që mund të vinte drogë këtu, atje, siç presim, policia pret, edhe sot që flasim në pika të ndryshme ku ka indicie.

Eni Vasili:A është një ngjarje e rëndë ngjarja e Divjakës. A ka përgjegjësi policia e Lushnjes..apo?

Rama:A jeni në metro apo jo. Unë do doja të mbyllnim këtë pjesë të bisedës, sepse mua kjo bisedë realisht qesharake, sepse po ju përsëris që nëse në Shqipëri bëhet gjithë ky debat për një rats si ky, kini parasysh që avionë të kësaj natyre në vende të tjera ulen e ngrihen shumë më shpesh dhe askush nuk merr përsipër të flasë broçkullat që fliten në Shqipëri dhe askush nuk merr përsipër të fajësojë të madh e të vogël për një çështje të tillë, por lufta zhvillohet…

Eni Vasili:Avionë me drogë apo avionë për turizëm e keni fjalën, thjeshtë për kuriozitët..?

Rama:Tani lexoni artikullin e ‘Corriere de la Serës’ se në rast se ky avion vjen në Shqipëri për të bërë këtë punë, ku do ta çonte? do ta çonte diku tjetër apo jo? Pra avionët ngrihen diku dhe ulen diku tjetër. Kjo është pjesë e një lufte dhe atëherë çfarë po diskutojmë.

Eni Vasili:Dakord trafik ka gjithandej, ka në Itali e Selanik, por ne po themi a duhet ta kishit kapur ju në Shqipëri, pa rënë?

Rama:Ku ta kishim kapur, si ta kishim kapur, ta kishim kapur në ajër…?!

Eni Vasili:Mund ta parandalonit?

Rama:Si ta parandalonim, me kundërajror, me avionë që shoqërojnë avionin e vogël?!

Eni Vasili:Si e vlerësoni punën e Ministrit të Brendshëm?

Rama:Punën e ministrit të Brendshëm unë e vlerësoj absolutisht, të shkëlqyer, jo shumë të mirë, të shkëlqyer. Dhe jam shumë serioz në këtë dhe mund t’ju jap shumë argumenta për këtë. Ministri i Brendëshëm nuk është një magjistar dhe ne nuk kemi asnjë shkop magjik që një vend të rrënuar dhe të shpuar me vrima nga të katër anët dhe ku ka kaluar droga, ku ka kaluar paraja e pistë, ku ka kaluar gjithfarë krimineli dhe ku është strehuar gjithfarë krimineli ta kthejmë në një vend që nuk ngjan fare me atë që ishte para 9 muajsh, në 9 muaj. Kjo nuk mund të ndodhë dot, ama fakti që sot ne kemi rezultate për të cilat fatmirësisht ka sy për të parë, ka veshë për të dëgjuar, ka edhe mendje për të kuptuar dhe në këtë rast flasim për sy e veshë objektivë dhe mendje objective që është ajo e Komisionit Evropian dhe e partnerëve tanë. Mjafton për të thënë se jemi në rrugën e duhur. Nuk kemi thënë ne që do bëjmë mrekullira. ne kemi thënë që Brenda 300 ditësh do e rilindim këtë vend. Dhe ne po e rilindim këtë vend hap pas hapi. Por sa hap e mbyll sytë nuk ka. Kemi thënë që për 300 ditë do sjellim Policinë e Shtetit në krye të detyrës. Kemi thënë 300 ditë, nuk kemi thënë as 30 ditë as 60 ditë. Dhe ne e kemi kthyer Policinë e Shtetit në krye të detyrës, përpara 300 ditëve. Këtu është kollaj të rrish e të thuash po kjo e po ajo, por gjëja që na mjafton për të kuptuar se pse Ministri i Brendëshëm po bën një punë të shkëlqyer dhe këtë e them pa asnjë rezervë, sepse është ditë natë në krye të detyrës, sepse është në krye të një kantieri shumë të madh reformash që sot nuk janë as të dukshme, as të prekshme, por këkrojnë kohën e tyre dhe sepse nga ajo gjendje tërësisht e rrënuar, ku Policia e Shtetit ishte tërësisht e lidhur me krimin, ku kupola e policisë ishte e lidhur me krimin, Departamenti Amerikan i Shtetit një vit më parë thoshte se flitet për fije që lidhin zyrtarët e lartë me krimin, nuk e thoshim ne, atëhere si mendoni ju, për 9 muaj të gjitha këto mund të pastrohen dhe mund të kthehet e gjitha në një vend që nuk do ndodhë asgjë?

Eni Vasili:Pra, ende nuk e keni pastruar? Jeni gjithmonë në proces. Mund të themi sot që policia është pastruar nga fijet e krimit?

Rama:Ne mund të themi sot që nuk ka më lidhje të shkurtër mes krimit dhe kupolës së Policisë së Shtetit. Këtë mund ta themi. Që krimi mund të ketë fijet e veta në Policinë e Shtetit, do të ishte absolutisht fëmijënore që ta mohonim dhe lufta brenda Policisë së Shtetit kundër çdo lloj inkriminimi dhe të inkrimuinuari vazhdon intensivisht se s’do kishte 148 proçedime penale për njerëz brenda Policisë së Shtetit nga vetë Policia e Shtetit.

Eni Vasili:Ju thoni që pas 300 ditësh policia është kthyer në detyrë…

Rama:Jo 300 ditë nuk kanë ardhur akoma..
…që situate është më ndryshe, etj.
Situata nuk është më ndryshe. Situata është shumë më ndryshe në motivimin e Policisë së Shtetit, në punën e Policisë së Shtetit dhe në rezultatet e Policisë së Shtetit.

Eni Vasili:Kemi patur një valë të madhe tritoli, një valë të madhe droge..

Rama:Nuk kemi një valë të madhe droge. Kemi një valë të madhe kapjeje të drogës. Janë dy gjëra krejtësisht të ndryshme. Vala e madhe e trafikut të drogës ka qenë aty. Por ju s’e keni parë, ne s’e kemi parë sepse s’e ka kapur kush.

Eni Vasili:Rastet për tentativë për trafikim janë të njëjta..

Rama:Me aritmetikën e kujt?
Unë di të them se në 3 muajt e fundit është kapur 5 herë më shumë drogë sesa …

Eni Vasili:Këtë herë trafikantët ngarkohen më shumë..

Rama:Unë them që, këtë e thonë specialistët dhe këtë e ka thënë një ekspert i një policie të huaj që ka vizituar Shqipërinë para disa muajsh dhe më ka thënë, zoti Kryeministër duhet të ndjeheni besimplotë, sepse në momentin kur policia kap një sasi të tillë drogë ka filluar diçka të ndryshojë, flitej atëherë për një sasi të madhe. sepse do të thotë që kush kapet me një sasi të tillë nuk arrin të blejë ata policë që qëllojnë që e kapim. Kjo është për tu patur shumë mirë parasysh. Ata që arrijnë të trafikojnë drogën me sasi të mëdha dhe që arrijnë të bëjnë trafiqe të tilla si disa nga rastet flagrante që ene kemi kapur, ndihen shumë të fortë përgjithësisht dhe kanë një forcë shumë të madhe korruptive. Në momentin kur kapen tregojnë se kanë përballë një forcë jo aq lehtësisht të korruptueshme siç e kishin deri dje, që s’e kishin problem fare.

Eni Vasili:Një sqarim të fundit lidhur me këtë çështje dhe doja ta mbyllja. Po deklarata e Prokurorit të Barit që shpesh herë i referohet opozita si autostradë droge?

Rama:Unë nuk e di deklaratën e prokurorit të Barit, por ju që më pyesni mund të më thoni që kjo autostrada e drogës është hapur pas 23 qershorit?

Eni Vasili:Ata janë tashmë në opozitë. Ju jeni kryeministër i Shqipërisë?

Rama:Ne kemi ardhur ta mbyllim atë autostradë. Ka qenë më përpara, jam shumë dakord me ju.

Eni Vasili:Ju tashmë jeni kryeministri, përgjegjësia është e juaja?

Rama:Patjetër unë jam kryeministër. Unë nuk jam magjistar dhe nuk kam asnjë fuqi magjike që autostradën e hapur për kaq shumë vite për trafikun e drogës, unë, apo Ministri i Brendshëm, apo të dy bashkë ta mbyllim apo e gjithë qeveria ta mbyllë sa hap e mbyll sytë. Këtë fuqi magjike ne as kemi pretenduar ta kemi dhe as mos na e kërkoni. Por që këtë autostradë ne do ta mbyllim, do ta mbyllim.

Eni Vasili:Kur?

Rama:Do ta mbyllim atëhere, kur koha që na duhet dhe të gjitha reformat që ne po bëjmë për ta kthyer policinë e shtetit shqiptar në një polici të standarteve evropiane të jenë materializuar.

Eni Vasili:Qeveria duhet të hyjë në Lazarat dhe të ndalojë mbjelljen e drogës, thotë ztr. Blushi.

Rama:Qeveria do të hyjë në Lazarat, atëherë kur qeveria do të jetë e bindur që është momenti për të hyrë në Lazarat dhe qeveria do të jetë e bindur se është momenti për të hyrë në Lazarat, atëhere kur ekspertët e policisë dhe policia e shtetit të jetë e bindur se është momenti për të ndërhyrë në Lazarat.

Eni Vasili:Që do të thotë?

Rama:Që do të thotë kur të jetë momenti për të hyrë në Lazarat

Eni Vasili:Por jo vetëm Lazarati, ka edhe zona të tjera. Do të marrë shumë kohë qeveria, ndërkohë që vazhdojnë mbjelljet?

Rama:Ndërkohë që ne flasim jo më larg sesa sot, një sasi tjetër është kapur duke dalë nga Lazarati. Kështu që është si ta marrësh këtë punë. Varet se nga ç’këndvështrim e sheh këtë. Mos harrojë askush se çfarë po kapet është droga që është mbjellë në periudhën e tranzicionit mes dy qeverive.

Eni Vasili:Dhe trafikohet tani…

Rama:Po sigurisht që tani trafikohet, pse kur do trafikohet. Mbillet në verë dhe trafikohet në pjesën tjetër të vitit dhe po kapet përditë.

Eni Vasili:Por shpëton edhe pa kapur..

Rama:Shpëton edhe pa kapur, siç shpëton në çdo vend të botës pa kapur.

Eni Vasili:A mund të na thoni ndonjë detaj më konkret rreth planit për Lazaratin?

Rama:Unë nuk mund t’ju them asnjë plan për Lazaratin, sepse nuk është kryeministri që bën plane për Lazaratin. Me Lazaratin si një vend ku kultivohet kanabis merren ata që e kanë detyrë të merren dhe ata quhen policia e shtetit shqiptar. Dhe kur Policia e Shtetit shqiptar të jetë gati për të ndërhyrë në Lazarat , ateherë sigurisht do këkrojë edhe mbëhstetjen e duhur dhe do të etë gjithë mbëhstetjen tonë dhe timen personalisht.

Eni Vasili:Ztr. Rama qëndrojmë tek Prokuroria, marrëdhënia që keni me të. Konteksti është pikërisht pas akuzave të opozitës, keni deklaruar që me ztr. Berisha dhe Basha do të shkoni atje…

Rama:Unë kam thjesht një neveri nga kjo histori e gjatë fajesh pa fajtorë, akuzash pa prova, përpjekjesh për të budallepsur popullin shqiptar me gjithëfarë monstruozitetesh dhe në fund asnjë lloj marrje përgjegjësie për gjithçka thuhet. Dhe shumë thjesht, sot në Shqipëri nuk kemi një media që të ketë fuqinë, qoftë nga ana e vet, por qoftë dhe fuqinë mbi publikun që të diskreditojë këta lloj politikanësh dhe këto lloj akuzash, çfarë mbetet? Se normalisht po të bëheshin këto lloj akuzash në një vend tjetër, këta lloj politikanësh nuk i kishe më rrotull, jo të rrinin 20 vjet dhe të vazhdonin ta merrnin popullin zvarrë. Sepse nuk do t’i lejonte dot opinioni publik, sepse nuk do t’i lejonin mediat që ta bënin një gjë të tillë. Do të thoshin kjo është e vërtetë kjo s’është e vërtetë, ti gënjen, këtu këtu këtu, kur bëhet fjalë për gjëra të tilla. Kjo s’është, atëherë është shumë e thjeshtë, nëse një nga këto akuza është e vërtetë, për çfarë duhet të bëhet gjithë kjo histori, që të thirret populli hajeni mblidhuni që të çojmë në shtëpi kryeministrin. Kryeministri shkon në shtëpi vetë, madje jo shkon në shtëpi por mbyll derën dhe nuk del më asgjëkundi që ta shikoni ju, në rast se provohet një, jo të gjitha, nga akuzat. Se gjithë ato idiotësira të treguara si fakte, që kryeministri dha urdhër që të digjet kulla e aviacionit, kryeministri dha urdhër që të mbushet avioni, kryeministri ishte i lidhur me atë, ai fjeti në shtëpinë e ministrit të Brendshëm dhe ku di unë. Mjafton një provë dhe gjithçka merr fund, është shumë e thjeshtë. Ose pastaj në qoftë se nuk ka prova, të marrin përgjegjësinë para publikut ata që e kanë, duke shkuar në Divjakë, dhe në këtë rast konkretisht Saliu me Jozefinën mendova unë, mu duk edhe si romantike për Divjakën, të marrin pjesë në këtë fushatën e dizinsektimit, punë vullnetare quhet, ka dënime me punë vullnetare. Berluskoni po e bën te pleqtë, këta të dy mund ta bënin tek mushkonjat. Ajo që unë dua të them është që këto janë të gjitha një llum i neveritshëm që nuk ka lidhje me politikën, nuk ka lidhje me opozitën, nuk ka lidhje me debatin mes partive, nuk ka lidhje fare me interesat e vendit, interesat e publikut. Kjo është një luftë njerëzish të bërë tapë pas humbjes së pushtetit, që vazhdojnë dhe jetojnë në avujt e pushtetit të humbur.

Eni Vasili:Opozita ju ka akuzuar, por ndoshta jo personalisht si Edi Rama, si kryeministër dhe jo thjesht për faktin që jeni implikuar drejtpërdrejt, por mënyrën si po qeverisni. Sipas opozitës, ju duhet të shkoni në shtëpi sepse po keqqeverisni ztr. Rama.

Rama:Sikur të ishte kaq e thjeshtë sa e thoni ju, do ishte gjëja më normale në botë, se nuk do ishte opozitë në qoftë se nuk do të dëshironte që unë të shkoja në shtëpi.

Eni Vasili:Keni deklaruar gjithashtu se çështjet e korrupsionit janë në tavolinën e kryeprokurorit, a ju është përgjigjur prokuroria?

Rama:Unë pres, ne presim që ta shikojmë prokurorinë të përgjigjet dhe përgjigjia e prokurorisë është që nga dosjet që ne kemi depozituar me prova të qarta për korrupsion të kalohet në procese gjyqësore për korrupsion.

Eni Vasili:Sa dosje, përveç atyre që janë bërë publike?

Rama:Unë nuk merrem me numërim dosjesh. Kjo është një çështje që ka të bëjë me qeverisjen tonë, në çdo dikaster ka audit, në bazë të auditit nxjerrim konkluzionet. Dhe kur konkluzionet që dalin kanë të bëjnë me shpërdorime detyrë, abuzime me detyrën, korrupsion në detyrë, ato i drejtohen prokurorisë.

Eni Vasili:Keni një koment për performancën e deritanishme të prokurorisë dhe kryeprokurorit?

Rama:Nuk kam dëshirë të bëj komente për performancën e institucioneve të pavarura. Thjesht dhe vetëm mendoj që publiku shqiptar me të drejtë pret drejtësi, dhe nga ana tjetër drejtësia që shqiptarët presin, nuk mund të burojë thjesht dhe vetëm nga vullneti i plotë që qeveria, ka për të kontribuar që në Shqipëri të ketë drejtësi por duhet të burojë dhe si akt pas akti i atyre institucioneve që janë drejtpërdrejt të lidhura me dhënien e drejtësisë.

Eni Vasili:Qëndrojmë tek drejtësia, në mbledhjen e grupit parlamentar socialist, ditën e djeshme, paralajmëruat reformë në drejtësi, që në fakt do ishte një hap i guximshëm për një qeveri, nëse më lejoni ta quaj kështu, duke patur parasysh faktin që drejtësia është e ndarë nga ekzekutivi, nuk varet nga ju, do t’i shkoni deri në fund deklaratën tuaj ztr. Rama?

Rama:Reforma në drejtësi nuk do të thotë që ne të marrin drejtimin e sistemit të drejtësisë. Do të thotë që ne të bëjmë disa ndërhyrje të domosdoshme në legjislacion, që sistemi i drejtësisë të funksionojë më mirë dhe të krijohen kushtet që drejtësia të japë më shumë drejtësi.

Eni Vasili:Nga do ta nisni këtë reformë, nga KLD-ja, një material është bërë publik në media…

Rama:Ne kemi ngritur prej kohësh një skuadër e cila e ka përgatitur kantierin e reformës. Dhe kur të hapet kantieri i reformës do të shpalosen idetë e para që do të diskutohen gjerësisht me të gjithë ata që janë të interesuar që në Shqipëri të ketë drejtësi. Nuk diskutohet edhe drejtpërdrejt me njerëzit e sistemit, me partnerët ndërkombëtarë. Komisionit të Venecias i është dërguar një kërkesë për të dhënë një serë rekomandimesh. Do të bëhet një proces i standardeve evropiane edhe në kuptimin e procesit, siç po bëhet procesi i standardeve evropiane për reformën e madhe territoriale.

Eni Vasili:Do të synoni që reforma në drejtësi të jetë konsensuale?

Rama:Ne synojmë që çdo gjë të jetë konsensuale, por ne nuk presim me çdo kusht konsensus kur kemi mundësi që gjërat t’i çojmë përpara sepse e kemi detyrim të dëgjojmë por të udhëheqim.

Eni Vasili:Qëndrojmë tek gjyqësori zoti kryeministër. Për herë të parë duket se ka një çështje konkrete që po diskutohet dhe që ka filluar të hetohet, është çështja e gjykatësit Gjin Gjoni, nëse mundeni të na jepni një koment për këtë çështje…

Rama:Nuk kam asnjë koment për të bërë, veç faktit që si të gjithë opinioni publik edhe unë jam shumë i dëshiruar të shikoj që drejtësia të bëjë drejtësi dhe që kushdo që është i përfshirë në shkelje të ligjeve dhe dëmtimin e interesit publik, që lidhet me cenimin e të drejtës në këtë vend, të gjykohet dhe të ndëshkohet. Sidomos pastaj kur bëhet fjalë për gjyqtarë, njëlloj sikur bëhet fjalë për policë që përzihen në punët e krimit, jo për të luftuar krimin por për të bashkëpunuar me krimin, apo kur bëhet fjalë për politikanë që përzihen me paranë e paligjshme për përfitime të paligjshme.

Eni Vasili:Po marrëdhënia me SHISH ztr. Rama është rikuperuar disi pas deklaratës për çështjen e drogës kur u tha që nuk ka evidenca, nuk ka fakte? Duket sikur është zbutur, ju keni qenë shumë kritik ndaj këtij institucioni.

Rama:Unë personalisht asnjëherë nuk kam marrë përsipër të bëj komente për SHISH në publik, sepse besoj që detyra ime si kryeministër dhe detyra shumë delikate e SHISH janë të lidhura me njëra-tjetrën në një komunikim sa më rigoroz dhe institucional.

Eni Vasili:E keni akuzuar se nuk ju furnizon si duhet me informacion, nuk kryen detyrën e vet…

Rama:Unë nuk kamë bërë asnjë akuzë të tillë.

Eni Vasili:Kryetari i Komisionit të Sigurisë, ztr. Braho deklaroi ditë më parë se Presidenti i Republikës duhet shkarkuar, ndani dhe ju të njëjtin mendim?

Rama:Nuk e kam parë këtë deklaratë. Unë nuk lexoj gazeta, e dinë të gjithë këtë punë, është fakt i njohur. Ju kërkoni koment të një komenti që është akoma më tepër, unë nuk komentoj fjalët e të tjerëve, aq më tepër të njerëzve që janë pjesë e të njëjtit koalicion, pjesë e të njëjtës qeveri, pjesë e të njëjtës parti, sepse preferoj t’i dëgjoj nga afër dhe t’ja them atë që mendoj nga afër. Në parim nuk komentoj.

Eni Vasili:Presidenti i Republikës ankohet prej disa kohësh se mazhoranca po mundohet t’i marrë kompetencat, kemi parasysh disa ligje, cila është marrëdhënia juaj me Presidencën, a është problematik bashkëpunimi?

Rama:Presidenti është akoma më shumë pjesë e asaj që thashë për kulturën time dhe përpjekjen time që në bazë të kësaj kulture të vendosim disa standarde të reja në komunikimin mes institucioneve, kështu që çfarëdo që të kem për presidentin, mos prisni ta them publikisht. Sepse ditën që do ta them publikisht, pastaj gjërat do të kenë shkuar në një pikë që unë nuk do ta uroja kurrë.

Eni Vasili:Kalojmë tek tematika e qeverisë tuaj, mënyrës si po qeverisni zoti Rama. Ndalemi në një moment të rëndësishëm, që është statusi. Qershori është një muaj vendimtar. Ju keni thënë shpesh herë që jemi edhe më pranë marrjes së statusit, nga e keni marrë këtë garanci?

Rama:Nga rezultatet e qeverisë, nga ta marr tjetër. Dhe nga jehona që rezultatet e qeverisë kanë në BE dhe nga reagimet e miqve dhe partnerëve tanë, me të cilët besoj se Shqipëria ka sot një intensitet kontaktesh që e kishte humbur prej disa vitesh.

Eni Vasili:A keni marrë ndonjë premtim konkret, sidomos nga vendet problematike që e kanë refuzuar Shqipërinë?

Rama:Vendet e BE-së nuk bëjnë premtime konkrete, por thonë konkretisht se çfarë presin

Eni Vasili:Keni vizituar Berlinin, Romën, Vjenën, Brukselin disa herë, krerë shtetesh, përfaqësues të lartë kanë ardhur këtu. Javën e ardhshme vizitoni edhe kryeministrin holandez. Janë vizita kortezie, të një qeverie të re, të një kryeministri të ri, është normale kjo, apo ka diçka më shumë?

Rama:Nuk dua të jap asnjë atribut të veçantë vetës, por nuk mund të rri pa i dhënë një atribut Aleancës për Shqipërinë Europiane dhe qeverisë e qeverisjes sonë. Është për shkak të qeverisjes që këto vizita po bëhen në këto nivele dhe me këtë protokoll. Është një protokoll i lartë që nuk është rezervuar gjithmonë edhe kur vizita të tilla kanë ndodhur.

Eni Vasili:Do doja të dija nëse keni ndonjë informacion, ndonjë qëndrim, a mund të jemi dhe ne optimistë, a do ta marrim shkurt statusin në qershor?

Rama:Nuk do t’ja lejoja kurrë vetes të flisja në emër të Gjermanisë, Francës, Holandës dhe me radhë. Ky është një vendim që do të merret në momentin e fundit, dhe pasi të lexohet dokumenti që do të nxjerrë Komisioni Europian. Ne kemi bërë gjithçka që është kërkuar prej nesh, kur na është thënë se kemi nevojë për më shumë kohë, sepse kemi nevojë të shikojmë nëse këto që keni bërë deri në dhjetor janë të qëndrueshme dhe si do të vazhdojë më tutje kjo luftë mbresëlënëse kundër krimit, kundër korrupsionit dhe për reformimin e vendit. Unë besoj se i kemi bërë të gjitha ato që duhen për të merituar respekt të plotë. Pastaj dihet që statusi në fund nuk është një vendimmarrje plotësisht e parashikueshme dhe objektive. E pamë në dhjetor kështu që mos ta zgjasim në këtë aspekt, sepse ka dhe këtë elementin tjetër që nuk ka të bëjë me ne dhe çfarë bëjmë ne këtu.

Eni Vasili:Reforma administrative-territoriale duket se do të votohet vetëm nga maxhoranca. Cilat janë realisht kostot e miratimit në mënyrë të njëanshme të kësaj reforme të rëndësishme?

Rama:Nuk ka asnjë kosto, miratimi i kësaj reforme ka vetëm të mira publike. Një reformë e tillë nuk është se miratohet me konsensus në vendet e tjera të BE-së domosdoshmërisht. Jo më larg se pak kohësh është bërë një reformë e tillë në një nga landet e Gjermanisë, dhe miratimi është bërë me votim të thjeshtë, mbi bazën e një grupi ekpertësh teknikë pa lidhje fare me partitë politike. unë jam shumë krenar për punën që ka bërë grupi i punës, ministri Cuci, i cili padrejtësisht do të mbetej dsot në hije, sepse puna ë ka bërë është jashtëzakonisht e shkëlqyer. Po ashtu kemi qenë me fat që në komisionin e reformës kemi në krye një nga njerëzit më të ditur për eksperiencë të gjatë në fushën e administrimit vendor, që është Bashkim Fino.

Eni Vasili:Opozita është krejtësisht e paqetë sepse nuk merr pjesë, një nga mosbesimet e opozitës është se kjo është një hartë e re politike.

Rama:Detyra ime nuk është të bind opozitën, detyra e opozitës është të bindi popullin, detyra ime është të udhëheq një qeveri e cila i ka shumë të qarta gjërat që kërkohen prej saj. reforma administrative-territoriale është një nga gurët themeltarë të një Shqipërie të rilindur dhe ne nuk mund ta vonojmë rilindjen e vendit në asnjë asket dhe për asnjë arsye dhe do të bëjmë gjënë e duhur. Kemi 5 opsione në tavolinë, opozita fare mirë mund të thotë nëse ky apo ai opsion është i dëshirueshëm për të.

Eni Vasili:Ju e konsideroni tepër të rëndësishme reformën territoriale dhe kjo reformë nuk bëhet shpesh, të paktën kështu jeni shprehur në një intervistë tuajën. Pra rrezikon të jetë joafatgjatë kjo reformë?

Rama:Kjo reformë do jetë shumë afatgjatë besoj unë qoftë dhe thjesht për arsyemn e thjeshtë se kërkon një shumicë të cilësuar dhe koha e shumicës së cilësuar është historike sic ishte 23 qershori. Kështu që opozita ka rastin që të japë kontributin e vet në një reformë që do të bëhet, me apo pa opozitën.

Eni Vasili:Ztr. Rama, punësimi është një argument që juve ju pëlqen. Të dhënat e fudit tregojnë që gjatë kohës së qeverisjes suaj numri i të punësuarve në Shqipëri është shtuar me 25 mijë vetë.

Rama:Pak më shumë

Eni Vasili:Janë të dhëna që janë në webet tuaja…Ndërkaq janë të dhëna tregues që dëshmojnë se nuk e kapni dot shifrën 300 mijë deri në fund të mandatit, dhe po kështu nuk dimë sa vende pune kemi humbur.

Rama:E para e punës njëherë, nuk bëhet llogaria kështu se nuk është si një, po themi ngrënia e vakteve, që do hamë kaq gram që ushqim për vakt dhe plus kaq vakte për të arritur këtë sasi të ngrënë gjatë një viti. Nuk është kështu. Unë besoj se jemi në rrugën e duhur në këtë aspekt dhe rritja e punësimit do të vijë në radhë të parë nga rritja e investimeve në sektorin privat. Dhe këtu jemi fokusuar shumë fort dhe do kemi të reja në progresion vit pas viti në gjithë mandatin tonë.

Eni Vasili:Gjatë vizitës së fundit në Shqipëri të FMN, Fondi u shpreh se ekonomia shqiptare po ecën në rrugën e duhur, ka probleme me sektorin energjisë, pronave. Sipas mendimit tuaj po performon mirë ekonomia ztr. Kryeministër?

Rama:Të paktën në këtë rast kemi një arbitër plotësisht të besueshëm dhe aspak bujar në dhënien e komplimenteve sic është FMN që ka bërë një vlerësim që ekonomia është kthyer në rrugën e rritjes pas një periudhe dramatikisht dramatike dhe jemi sot në kushtet kur kemi kthyer qeverinë në krye të detyrës se nuk jemi duke mbajtur publikun me gajret me prerje shiritash me paratë e të tjerëve, me paratë e kompanive, por jemi duke u kthyer kompanive borxhet dhe jemi duke bërë një gjë të rëndësishme duke rritur të ardhurat pa u rënë në qafë kompanive as me gjoba. Në rast se krahasojmë të ardhurat e kësaj periudhe dhe këtu është pika më e rëndësishme për një qeveri dhe pika më e nxehtë e një debati të shëndetshëm dhe jo historitë pakuptim për të neveritur dynjanë me drogën që kemi një rritje të ardhurash të konsiderueshëm që flet për një rikthim të ekonomisë në rrugën e duhur dhe që ka dy shenja shumë të rëndësishme. E para, nëse në krahasim me vitin e kaluar këto të ardhura janë rritur ndjeshëm, duhet bërë dhe një ulje tjetër 10% tek shuma e vitit të kaluar që vinte nga gjobat, 10%. Zëri i të ardhurave për qeverinë e kaluar ishin gjobat, ishin rezultatet e dhunës, që rritej dhuna ndaj kompanive. Dhe nga ana tjetër kemi një rritje spektakolare që do luftojmë me mish e shpirt që ta kthejmë në rritje të qëndrueshme që mos të jetë thjesht rezultat i qeverisë së re që vjen me disa energji të reja që është nga rritja e të ardhurave nga tatimi mbi vlerën e shtuar. Nëse ata e kishin me një mesatare me 6%, ne e kemi me 20% dhe kjo do të thotë se kemi një proces formalizimi të ekonomisë që është një nga gjërat më të shëndetshme që po ndodh dhe që nuk ka ndodhur kurrë këtu prej shumë vitesh me një shenjë të tillë kaq të fortë.

Eni Vasili:Unë dua të ndaloj në sektorë problematikë që përmendi FMN. Ca do bëhet, përshembull me CEZ?

Rama:Energjitika është njësoj si me drogën, është një plagë e madhe e trashëguar nuk është një oplagë e hapur sot.

Eni Vasili:A keni një plan konkret për CEZ?

Rama:Kemi një plan për cdo gjë se nuk do kishim dalë tu thoshim shqiptarëve, na jepni votën. Kemi një plan për energjinë, për luftën kundër krimit të organizuar, për luftën kundër korrupsionit për transformimin e arsimit, kemi plan për transofromimin e shërbimit shëndetësor që është ende larg për asaj që njerëzit na kanë votuar.

Eni Vasili:Për CEZ…

Rama:Unë dua të përsëris e të përsëris e të përsëris në pamundësi të jem përditë përballë jush dhe të bëj përditë punën që bëni ju për të bërë punën tuaj që flisni e flisni e flisni se kjo është puna juaj se ndryshe nga sa thoni ju por të gjith si puna juaj, por duhet pasur durim. Se nuk bëhen të gjitha gjërat që janë rrënuar për kaq e kaq vite të kthehen në normë brenda një dite.

Eni Vasili:Po ish-pronarët që presin që qeveria të kthejë pronat e tyre?

Rama:Po patjetër.

Eni Vasili:Keni një plan për ta?

Rama:Është një problem dhe ky shumë i madh por që nuk u krijua pas 23 qershorit. Problem që do merremi shumë seriozisht dhe për herë të parë do të ketë një qeveri që do ketë një strategji të qartë dhe për këtë, që do të thotë, kjo është strategjia as më shumë as më pak.

Eni Vasili:Legalizimet, një cështje tepër e rëndësishme. Po kaloj në mënyrë ritmike se minutat janë në fund.

Rama:Po se u morët shumë kohë me avionin ndaj…

Eni Vasili:Çështje e rëndësishme, çështje e ditës mendoj se e meritonte. Por po arrijmë t`i prekim të gjitha.

Rama:Ajo është cështje e së kaluarës se ditët ecin me shumë shpejtësi dhe gjërat këtu lëvizin me shumë shpejtësi…

Eni Vasili:Legalizimet, thatë se keni mbajtur premtimin për legalizime falas. Opozita kundërshton.

Rama:Ju si mendoni, janë falas apo nuk janë falas…

Eni Vasili:Procedura?

Rama:Çfarë domethënë procedura? Legalizimi është procedurë nuk është asgjë tjetër.

Eni Vasili:A besoni se shqiptarët se premtuat legalizim falas.

Rama:Falas është.

Eni Vasili:Procedura, jo toka…
A ka patur shqiptarë që kanë besuar ndryshe në premtimin tuaj?

Rama:Unë di që shqiptarët që unë takoj dhe që marrin në dorë dokumentet apo që pritet të marrin dokumentet janë shumë herë më të qartë se sa ju që turbulloheni duke dëgjuar opozitën. Legalizim do të thotë tapi, do të thotë që ti nga dikush që ke ndërtuar një shtëpi pa leje dhe që praktikisht nuk ekziston në asnjë letër dhe nuk je në regjistër, të kthehesh në pronar që ke në dorë një titull pronësie, ky është legalizim apo jo. Unë do të them që deri në momentin kur ti ke në dorë titullin e pronësisë dhe në momentin që ti bëhesh pronar, ti bëhesh pronar përmes një procesi që është falas.
Eshtë falas apo jo?

Eni Vasili:Po procedura po.

Rama:Jo procedura jo, kalimi nga statusi i okupatorit apo i ndërtuesit të paligjshëm, në statusin e pronarit. Ky është legalizimi. Je pushtues i një trualli që nuk është i joti, ose ndërtues i paligjshëm në një truall që është i joti, dhe kthehesh në pronar i ligjshëm, falas.

Eni Vasili:Ka një datë për mbylljen e këtij procesi?

Rama:Fikse? Që të vesh datë në këtë proces duhet të kesh të qartë gjithçka dhe që të kesh të qartë gjithçka në këtë proces është e pamundur, nga pikëpamja e sasisë, problematikës së dokumentacionit. Ne praktikisht draftin e kishim bërë gati për në janar, u detyruam ta shtyjmë, e ta shtyjmë, sepse ndërkohë dilnin problematika pas problematike, pse e një lëmshi që është bërë me procesin e legalizimeve, për të cilin janë aprovuar katër ligje dhe kanë dalë mbi 100 akte nënligjore, urdhra urdhëresa etj.

Eni Vasili:Keni premtuar shëndetësi falas, i keni dhënë vetes 4 vjet për ta arritur këtë, problematikat nuk mungojnë, ndër më të mprehtat mungesa e ilaçeve…

Rama:Problematika e ilaçeve është drejt zgjidhjes, është një problem i trashëguar. Ne nuk i gjetëm spitalet me ilaçe dhe papritur mbeten pa ilaçe. Ne i gjetëm spitalet bosh. Për të mbushur spitalet me ilace ka nevojë për një kohë të caktuar që lidhen me procedurat, nuk mund të kapërcehen këto procedura. Tani jemi në fazën që plotësimi i spitaleve me ilaçe po bëhet sepse po mbarojnë të gjitha ato hapa një pas një që duheshin ndjekur.

Eni Vasili:Çfarë konsideroni sukses dhe dështim në këtë moment të reformës tuaj në shëndetësi deri tani sigurisht?

Rama:Reforma në shëndetësi është vetëm në fillimet e saj, kështu që të thuash sukses apo dështim është shumë e parakohshme. Ndërkohë mendoj që sukses në shëndetësi është që sot ne kemi një listë barnash të rimbursueshme shumë më të gjatë se sa lista që ishte dhe njerëzit kanë disa alternativa dhe për barnat plotësisht të ruimbursueshme kemi sot çmime shumë herë më të ulta se sa kishim deri dje.

Eni Vasili:Jeni të kënaqur nga rezultati i konkursit që keni të zhvilluar për përmirësimin e imazhit të Shqipërisë. Ju i besoni vërtet kësaj metode, mund të përmirësohet imazhi i Shqipërisë me këtë metodë?

Rama:Duhet të kuptojmë që këtu nuk bëhet fjalë për imazh në kuptimin që të shkojmë të bëjmë make up përpara se të vimë në studio për të folur dhe të dukemi sikur jemi më të rinj, më bukur. Këtu bëhet fjalë për një proces që ka të bëjë me përmbysjen e një perceptimi negativ, përmes disa instrumenteve që do na bëjnë të mundur që njerëzit të shikojnë Shqipërinë që nuk njohin. Nuk bëhet fjalë për të trukuar një pamje, por për ta dhënë atë pamje dhe për të arritur të penetrojmë përtej murit negativ që nuk është i gjithi i pamerituar por që ka pjesën e vet të pamerituar.

Eni Vasili:Dy pyetje që më vijnë nga rrjetet sociale. Së pari më kërkojnë një gjykim tuajin për kreun e PD-së, ztr. Basha, si kryetar i PD dhe kryebashkiak.

Rama:Si kryetar i PD nuk kam gjykim se nuk është kryetar i Partisë Demokratike. Si kryetar i Bashkisë nuk kam gjykim se nuk është kryetar i Bashkisë. Ky është gjykimi im.

Eni Vasili:Cili është kryetari i Bashkisë?

Rama:Nuk kemi. Mirë berë që e ndave se kush është kryetar i PD-së dihet.

Eni Vasili:Pse e quani inekzistent ztr. Bashën?

Rama:Se nuk e shoh asgjëkundi, jo kryetarin e Bashkisë, po Bashkinë. Godinën po, por…

Eni Vasili:Ka pasur një debat për zgjedhjet brenda partisë tuaj, statutin e partisë tuaj, pyetja është pse nuk e ndryshoni statutin që të jeni edhe më të qetë. Shqetësimi i teleshikuesve është përsa kohë thyen statutin e partisë, çfarë bëhet me ligjet tona.

Rama:Statusi jonë e ka që kryetari i partisë është dhe kryeministër, domethënë që kryeministri është dhe kryetar partie. Dhe kjo buron nga tjetra që tek ne kryetari zgjidhet me parimin një anëtar një votë. Dhe në momentin kur kryetari bëhet kryeministër, është kryeministër për t’i shërbyer gjithë popullit jo për të filluar për të bërë zgjedhje në partinë e vet. Të gjitha partitë që kanë parimin një anëtar një votë nuk bëjnë zgjedhje në parti, kur kryetari i partisë është edhe kryeministër.

Eni Vasili:E keni në statut zoti Rama, pse nuk ndryshoni statutin?

Rama:Unë e dhashë përgjigjen, s’ka arsye për të ndryshuar statutin.

Eni Vasili:Denoncimet për emërimet e njerëzve të inkriminuiar në administratë, pyesin, pse vazhdon qeveria socialiste të emërojë njerëz të inkriminuar që denoncohet nga selia blu?

Rama:Unë nuk shoh shumë televizion për shkak të punës. Por më treguan dje që tek “Fiks Fare” kishte qenë një shumë e bukur që një i dënuar me burg del dhe flet për njerëz të dyshuar si të inkriminuar që nuk kanë qenë asnjë ditë as të dyshuar dhe as të arrestuar. Ai që del bën gjyqet publike ka qenë i dënuar, ka marrë dënim për korrupsion dhe del tani, është deputet i PD-së dhe merr neper gojë gjithë dynjanë. Në dy raste unë përgjigjen e kam dhënë, në dy raste që ka rezultuar e vërtetë, që bëhej fjalë për njerëz që kanë pasur një problem, në gjykimin tonë një problem që në mos ligjërisht nga pikëpamja etike ka qenë i pakapërcyeshëm, janë larguar.

Eni Vasili:Ka një kandidat PS për Bashkinë e Tiranës, thashethemet flasin për ztr. Tahiri?

Rama:Unë di që thashethemet flasin për avionin, kështu që nuk keni pasur kohë të merreni me këtë punë se jeni marrë me avionin, kështu që kjo është koha e avionit nuk është koha për kryetar bashkie.

Eni Vasili:Zoti Rama do të bëheni baba për herë të dytë, çfarë ndjesie keni?

Rama:Ndjesinë më të bukur që mund të ketë një njeri që bëhet baba për herë të dytë. Për mua është jashtëzakonisht i mrekullueshëm.

Eni Vasili:Kryeministër dhe baba, si mendoni se do i përballoni këto dy detyra, pasi janë të vështira të dyja?

Rama:Edhe unë nuk jam i lehtë, i vështirë jam dhe unë.

Eni Vasili:E parashikoni njësoj të vështirë, si punën e kryeministrit dhe punën e babait?

Rama:Këtë nuk e parashikoj, por nuk jam aspak i shqetësuar, pasi gjysmën time më të mirë, e kam aq të mirë sado nuk kam asnjë shqetësim.

Eni Vasili:Çfarë ka ndryshuar shtatzënia e Lindës, në jetën dhe në marrëdhëniet tuaja ztr. Rama?

Rama:Besoj që ka rritur dhe më shumë intensitetin e marrëdhënies mes nesh, që dukej se s’kishte ku të rritej më shumë se kaq.


Etiketa:
Arivisti Company