-10°C
Prizren

Shqiptarët e Luginës të përçarë në zgjedhje

Prizren Post | 10:27 - 24.04.2016

Preshevë – Kosova dhe Shqipëria kanë dështuar të unifikojnë faktorin politik shqiptar në Luginën e Preshevës për të garuar në zgjedhjet parlamentare të Serbisë. Kështu, shqiptarët po humbin ulëse deputetësh në Beograd.

Qytetarët e tri komunave shqiptare në Luginë, Preshevë, Bujanoc dhe Medvegjë, sot do t’u drejtohen pikave të votimit, për të zgjedhur udhëheqësit e tyre komunalë. Por, ata do të mund të votojnë edhe në zgjedhjet parlamentare, ndonëse në këto të fundit po merr pjesë vetëm Partia për Veprim Demokratik (PVD).

Këta të fundit, thonë se kanë synuar të garojnë në një listë të unifikuar të shqiptarëve për Parlamentin e Serbisë, me ç’rast do të fitoheshin së paku tri ulëse.

Por, duke mos arritur të merren vesh me subjektet tjera politike, PVD-ja ka vendosur që të garojë e vetme për parlamentin e Serbisë.

Ndërkaq, një subjekt i ri politik – Alternativa për Ndryshime, synon të ndryshojë strukturën politike në Preshevë, ndonëse ky subjekt nuk ka arritur të përgatitet për zgjedhjet parlamentare e as të zgjerojë strukturat e saj në dy komunat tjera, Bujanoc dhe Medvegjë.

Ndërkohë, mijëra shqiptarë të lindur në Luginë të Preshevës nuk do të kenë të drejtën e votës për zgjedhjet lokale dhe parlamentare në Serbi, në pamundësi për t’u pajisur me letërnjoftime.

Shqiptarët në Luginë të Preshevës po shlyhen nga evidenca civile dhe po bëhet pasivizimi i vendbanimeve, duke iu mohuar kështu dhe e drejta e votës. Ata po shlyhen nga evidenca civile pa ndonjë vendim nga organet shtetërore të Serbisë dhe pa u njoftuar për këtë.

Drejtuesit e institucioneve lokale shqiptare në Luginë të Preshevës thonë se kjo po bëhet me qëllim të ndryshimit të strukturës etnike në jug të Serbisë, me theks të veçantë në komunë të Bujanocit, ku edhe më tej shqiptarët janë shumicë.

Nagip Arifi, kryetar i Komunës së Bujanocit, ka thënë për “Zërin” se pasivizimi i vendbanimeve të personave me të drejtë vote ka filluar si procedurë nga Republika e Serbisë, duke pasivizuar sidomos shqiptarët që jetojnë në Malësinë e Bujanocit dhe atë të Karadakut në Preshevë. Arifi sqaron se sipas evidencës që posedojnë, në Bujanoc janë pasivizuar diku 300 persona me të drejtë vote.

Por, prapëseprapë ai thotë se numri i shqiptarëve që kanë të drejtë vote në këtë komunë është më i madh se i serbëve, shkruan Zëri.


Arivisti Company