TIRANË – Kryeministri i Shqipërisë, Edi Rama nuk ka komentuar dënimin me burg për ish ministrin e Punëve të Brendshme të Shqipërisë, Saimir Tahiri.

Rama theksoi se nuk i komenton asnjëherë vendimet e gjykatave.

“Unë nuk komentoj asnjëherë vendimet e gjykatave”, është shprehur kryeministri.

Ai ka thënë më tej se e ka ditur mirë çfarë ka bërë kur ka udhëhequr reformën në drejtësi dhe po të kthehej mbrapsht sërish do ta bënte të njëjtën gjë.

Ndryshe, një ditë më parë Gjykata e Posaçme la në fuqi vendimin e shkallës parë për ish-ministrin, me ndryshimin që Tahiri do të vuajë në burg dënimin me 5 vite heqje lirie, raporton euronews.al

Për shkak të gjykimit të shkurtuar, Tahiri do të vuajë 3 vite e 4 muaj. Ai mund të bëjë rekurs në Gjykatën e Lartë, 45 ditë nga dhënia e këtij vendimi.