E premte, 15 Prill 2016
Ata që për 17 vjet uzurpuan pronat shtetërore do të jenë subjekt i hetimit nga Prokuroria Speciale. Rastet e tyre, prokuroria e shtetit ka nisur t’i hetojë disa javë pasi Agjencioni Kosovar për Privatizim publikoi listat me emra dhe ndërmarrje që funksionojnë në hapësira të zëna pa qenë pronarë legjitim të tyre, që nga vitet e para të pas luftës.
Sipas AKP’së, janë afro 200 prona publike të uzurpuara. Në prokurori kanë konfirmuar për Gazetën Express se të gjitha rastet dhe personat e përfshirë janë nën hetime.
Me pronat e uzurpuara dhe me uzurpatorët, të cilët që nga paslufta kanë shfrytëzuar paligjshëm, toka, lokale e banesa, ka filluar të merret shteti.
Pas publikimit të listave me emrat e uzurpatorëve nga Agjencia Kosovare e Privatizimit,janë bërë thirrje që organet shtetërore të nisin hetimet.
Në prokurorinë e shtetit thonë se tashmë janë duke e bërë këtë.
“Ju informoj se Prokuroria Themelore në Prishtinë ka filluar hetimet preliminare lidhur me këto raste dhe te gjithë personat-rastet pa asnjë përjashtim, janë ne fazën e hetimit”, ka thënë Liridonë Kozmaqi -Hajdaraj, zëdhënëse në Prokurorinë Speciale në përgjigjet për Gazetën Express.
Mirëpo, ajo nuk ka treguar edhe shumë detaje për rastet që po hetohen.
“Për shkak se jemi në fazën e hetimeve dhe për shkak të mos dëmtimit te hetimeve këto janë informacionet që mund t’jua ofrojmë”, ka thënë për Express Kozmaqi-Hajdaraj.
Se shteti duhet të merret më personat që kanë uzurpuara pronat publike e patë thënë edhe drejtori i AKP’së, Petrit Gashi.
“Gjyqësori e ka këtë detyrë që t`i ndjekë këtë uzurpatorë”, pati dhënë ai.
E njohësi i ekonomisë, Ibrahim Rexhepi, ka thënë për Express se AKP-ja me publikimin listave dëshmoi një fakt tjetër shqetësues – ajo e ka ditur se cilat prona i ka të uzurpuara, kush janë uzurpatoret dhe asgjë nuk ka ndërmarre për lirimin e tyre.
“Pra, AKP-ja ka bashkëjetuar me uzurpatoret dhe për ketë duhet te mbaje përgjegjësi”, ka thënë Rexhepi.
Ai ka thënë se duhet gjithsesi të nis procedura e lirimit të këtyre pasurive dhe pronave.
“… dhe të hapet procedura gjyqësore ndaj uzurpatoreve për uzurpim dhe shfrytëzim të paligjshëm të pronës shoqërore, si edhe kompensimin e dëmeve për vitet që kanë pasur në shfrytëzim të paligjshëm. Pra kompensimi i fitimit të humbur për shkak se dikujt i është pamundësuar shfrytëzimi legal i pasurisë”, ka thënë ai.
Rexhepi ka treguar se shteti- qeveria nuk duhet të ndërhyjë në ketë proces, meqenëse kjo është përgjegjësi e AKP-se, si agjencion i pavarur.
Kurse Ehat Miftaraj, hulumtues i lartë në Institutin e Kosovës për Drejtësi, ka thënë për Express se prokurori i Shtetit me ligj është i obliguar të ndërmarrë veprime të menjëhershme, të zhvillojë hetime dhe fillojë me procedurat penale ndaj çdo personi të dyshuar për përfshirje në veprimtari kriminale.
“Shteti, respektivisht Prokurori i Shtetit duhet pa vonesë që në pajtim me Agjencinë Kosovare të Pronës, me agjencitë tjera që zbatojnë ligjin të bashkëpunojnë dhe koordinojnë aktivitetet për të identifikuar në radhë të parë, kryesit e kësaj vepre penale, për të filluar me hetime dhe procedura penale ndaj tyre, të bëjnë një vlerësim të dëmit që i është shkaktuar shtetit nga këta persona, në koordinimin dhe agjenci dhe institucione publike dhe private të specializuara të bëjnë një vlerësim të dobisë pasurore që individë apo biznese të caktuar kanë përfituar përmes kryerjes së kësaj vepre penale dhe gjatë procedurës penale të kërkohet që tërë dobia pasurore e fituar me vepër penale të konfiskohet dhe të i kthehet shtetit”, ka thënë ai.
Miftaraj, ka thënë se për të këto veprime, në radhë të parë duhet të gjendet vullneti dhe përkushtimi i organeve të ndjekjes për të luftuar, ndjekur dhe mbajtur penalisht përgjegjës personat që kanë vepruar në kundërshtim me ligj.
“…dhe që gjatë hetimit dhe zhvillimit të procedurave penale institucioni i Prokurorit të Shtetit ta zbatojë ligjin në mënyrë të barabartë, paanshme dhe të drejtë për gjithë personat e përfshirë pa marr parasysh prejardhjen e tyre politike apo pozitës shoqërore”.
Derisa, analisti Lumir Abdixhiku, pas publikimit të emrave të uzurpatorëve të pronave shoqërore, pati thënë se uzurpatorët duhet të largohen zvarrë jashtë pronave.
“E në paçtë shtet njëmend, në paçtë prokurori e gjyqësi siç duhet, në qoftë kjo Republikë e të gjithëve, mëngjesi gjithë këta uzurpatorë duhet t’i çetë zvarrë jashtë pronave – në ndjekje deri sa të mos kthejnë secilën para të fituar nga kapja e turpshme”, kishte komentuar Abdixhiku.
Agjencia Kosovare e Privatizimit (AKP), me 1 mars kishte publikuar listat me numrin prej 261 pronave të uzurpuara.
Kurse në raportin vjetor të cilin e ka publikuar të javë më parë ka raportuar se deri më 3 mars të këtij viti 167 ndërmarrje shoqërore (NSH) në Kosovë kanë qenë të uzurpuara nga persona të ndryshëm. /express/.
Etiketa: Prishtinë
