Anije me ndihma humanitare me destinacion Gazën u ankorua në Portin Ashdod të Izraelit sot, pasi forcat izraelite e kapën atë dhe arrestuan të gjithë aktivistët në bord, njoftoi transmetuesi publik i Izraelit KAN, transmeton Anadolu.

Nuk u dhanë detaje rreth gjendjes së aktivistëve në anijen Madleen.

Anija me flamur britanik synonte të thyente një bllokadë shkatërruese të vendosur nga Izraeli në Gaza, ku gati 55,000 njerëz janë vrarë në një sulm brutal që nga tetori i vitit 2023.

Duke mbajtur një sasi ndihmash, përfshirë ushqim, anija u kap nga forcat izraelite gjatë natës para se të arrinte në bregun e Gazës dhe u tërhoq në Portin Ashdod në Izrael.

Ushtarët izraelitë rrëmbyen 12 persona në bordin e Madleen, përfshirë 11 aktivistë dhe një gazetar, njoftoi Koalicioni i Flotiljes së Lirisë, një OJQ ndërkombëtare, e cila organizoi misionin.

Midis të ndaluarve janë aktivistja suedeze e klimës, Greta Thunberg; anëtarja franko-palestineze e Parlamentit Evropian, Rima Hassan, Yasemin Acar nga Gjermania; Baptiste Andre, Pascal Maurieras, Yanis Mhamdi dhe Reva Viard nga Franca, Thiago Avila nga Brazili, Suayb Ordu nga Turqia, Sergio Toribio nga Spanja, Marco van Rennes nga Holanda, dhe Omar Faiad, një gazetar i Al Jazeera Mubasher, gjithashtu nga Franca.