Deçan – Që nga viti 2000, Komuna e Deçanit dhe Manastiri i Deçanit kanë vazhduar “betejën” për pronat publike APIKO dhe Iliria. Së fundi, Kolegji i Apelit i Dhomës së Posaçme të Gjykatës Supreme të Kosovës ka marrë vendim që këto prona publike nuk i takojnë Manastirit.

Vendim i Kolegjit i marrë më 12 qershor 2015 ka nxitur shpresën e autoriteteve të Deçanit se drejtësia do bie në binarët e duhur.

Në Vendimin e Kolegjit të Apelit, të cilin edhe zyrtarisht komuna e ka pranuar të premten, thuhet se Dhoma e Posaçme e Gjykatës Supreme nuk është kompetente për t’i shqyrtuar këto çështje, ndaj kërkohet që rasti të kthehet për shqyrtim në Gjykatën Themelore në Pejë, dega në Deçan.

E ky vendim, sipas të parit të komunës, Rasim Selmanaj, është i drejtë.

Vendimi, po ashtu është i mirëseardhur edhe për shoqërinë civile në këtë qytet.

Në Manastirin e Deçanit nuk e kanë thënë asnjë fjalë të vetme lidhur më vendimin e gjykatës.

Sava Janjiq ka thënë se nuk është në disponim të flasë për këtë problem.

Ndërkaq, vendimi i Dhomës së Posaçme të 27 dhjetorit 2012 ishte i papranueshëm për qytetarët dhe institucionet e Deçanit, transmeton Koha.net.

Madje atë kohë ishin organizuar edhe protesta, duke kërkuar nga Manastiri që të mos pretendojë marrjen e pronave dhe bllokimin e zhvillimit ekonomik të kësaj komune.