Kuvendi i Kosovës në fillim të sesionit vjeshtor, një prej çështjeve më të nxehta do ta ketë ratifikimin e marrëveshjes për caktimin e vijës kufitare me Malin e Zi.

Qeveria ditë më parë i ka dhënë mbështetje kësaj marrëveshje, ndërkohë që banorët e zonës kufitare me Malin e Zi, vazhdojnë ta konsiderojnë të padrejtë një vendim të tillë. Për këtë, ata të mërkurën në mesditë do të protestojnë në zonën kufitare te vendi i quajtur ‘Te Arrat’.

Ali Lajçi që në cilësinë e vëzhguesit është pjesë e Komisionit shtetëror për caktimin e vijës kufitare me Malin e Zi, thotë se Qeveria po thirret në hartën e vitit 1974, por sipas tij, ajo është deformuar në disa pjesë të zonës kufitare me Malin e Zi.

Ai shpreh qëndrimin kundërshtues të banorëve dhe shfrytëzuesve të zonave kufitare me Malin e Zi, për vendimin për caktimin e vijës kufitare, ngase sipas tij, janë 12 mijë hektarë tokë të Kosovës, që me këtë marrëveshje i kalojnë Malit të Zi. Sipas Lajçit, me këtë marrëveshje, kufiri me Malin e Zi mund të bartë rreziqe.

“E shohin të papranueshme komuniteti, banorët dhe shfrytëzuesit e atyre zonave, sepse është cënuar vija kufitare. Nuk mund të jenë këto vija kufitare të qëndrueshme, mund të jenë me rreziqe, kurse ne interesohemi për kufij paqësorë”, tha Lajçi për Radio Kosovën.

Marrëveshja për demarkacionin e kufirit me Malin e Zi, pritet të nënshkruhet në Vjenë, gjatë samitit të Ballkanit Perëndimor, që do të mbahet më 27 gusht në Vjenë. E pas kësaj, Kuvendi i Kosovës në fillim të sesionit vjeshtor, pritet ta ketë këtë marrëveshje për ratifikim.
Ali Lajçi që ka qenë deputet në legjislaturën e tretë, iu bën thirrje deputetëve që mos të marrin vendim pa e sqaruar mirë çështjen e demarkacionit.

“Kërkojmë që të sqarojnë mirë këtë çështje, që deputetët mos ta rafitikojnë në Kuvend dhe të hidhet ky proces i dëmshëm. Të rishikohet gjendja, pastaj të bëjmë tjera vija, që do të jenë më reale dhe që shprehin kufij të qëndrueshëm paqësorë”, tha Lajçi.

Ndërkohë, gjatë ditës, të rinjtë e Aleancës për Ardhmërinë e Kosovës kanë zhvilluar një aksion simbolik para ndërtesës së Qeverisë dhe Presidencës, duke kundërshtuar nënshkrimin e marrëveshjes për demarkacionin e kufirit me Malin e Zi.
Të rinjtë e AAK-së gjatë aksionit vendosen parulla përmes të cilave iu bë thirrje Qeverisë e Presidencës që mos të bëjnë tregti me tokën e Kosovës. Kryetarja e Aleancës së të Rinjve të Kosovës, Diellza Hoti tha se presidentja dhe kryeministri duhet ta marrin parasysh zërin e të rinjve në çështjet me rëndësi për vendin.

“E lusim presidenten dhe kryeministrin që të na marrin parasysh sepse kjo është çështje nacionale që na prekë të gjithëve, ne jemi të ofenduar, duhet të merremi parasysh”, ka thënë Hoti.

Ndërkohë, Ali Lajçi ka bërë të ditur se edhe nesër nga ora 12 deri në orën 13 banorët e zonës së kufitare me Malin e Zi, do të protestojnë te Kulla në vendin e quajtur “Te arrat”.