E enjte, 21 Maj 2026
Karriera e Ben Gvir shpjegon më së miri derexhenë ku ka përfunduar Izraeli
Itamar Ben Gvir është ministri më ekstremist në qeverinë e Benjamin Netanyahut, më i djathti në historinë e Izraelit. Videoja e publikuar prej tij të mërkurën, ku ai parakalon në mënyrë triumfale dhe përbuzëse mes aktivistëve të Flotiljes Global Sumud, me duart e lidhura dhe i mbajtur me fytyrën poshtë në portin e Ashdodit në Izrael, shkaktoi reagime të gjera ndërkombëtare.
Por sigurisht, kjo nuk është e pazakontë për këtë figurë. Ky është roli i tij i parë i vërtetë qeveritar, por Ministria e Sigurisë Kombëtare i jep atij pushtet të konsiderueshëm. Ai kontrollon, ndër të tjera, policinë dhe rojet kufitare midis Izraelit dhe Bregut Perëndimor.
Për shumë vite, ai mbeti në periferi të politikës izraelite, tepër ekstremist, radikal dhe provokues për t’u konsideruar një bashkëbisedues i besueshëm. Megjithatë, që nga viti 2022, partia e tij “Fuqia Hebraike” ka qenë aleate kryesore e kryeministrit Benjamin Netanyahu, së bashku me Partinë Fetare Sioniste të ministrit të Financave Bezalel Smotrich.
Ben Gvir ka pikëpamje të hapura raciste, antimuslimane dhe antiarabe dhe ka një histori përfshirjeje aktive në organizata që më vonë u konsideruan terroriste. Ai jeton në Kiryat Arba, një koloni izraelite në Bregun Perëndimor, në periferi të qytetit palestinez të Hebronit, e konsideruar si një vendbanim i paligjshëm sipas ligjit ndërkombëtar.
Ai nuk e njeh ekzistencën e një populli palestinez dhe beson se si Bregu Perëndimor ashtu edhe Rripi i Gazës duhet të bëhen pjesë e një shteti më të madh hebre, në të cilin palestinezët mund të zgjedhin të jetojnë sipas ligjit izraelit ose të largohen.
Në vitet e fundit, ai ka qenë ndër mbështetësit më radikalë të luftës në Rripin e Gazës dhe të dhunës së ushtrisë izraelite, duke mohuar se ka pasur mungesë ushqimi.
Më 30 mars, parlamenti izraelit miratoi një ligj që ai propozoi, i cili do të vendoste dënimin me vdekje me varje për palestinezët e dënuar për akte terrorizmi në të cilat vdes të paktën një person, duke nxitur pabarazi të mëtejshme në trajtim midis palestinezëve që jetojnë në territoret e pushtuara dhe qytetarëve izraelitë.
Ben Gvir, 50 vjeç, lindi në një familje laike, por që në rini u përfshi në të djathtën ekstreme fetare dhe nacionaliste gjatë Intifadës së Parë Palestineze të viteve 1980 dhe 1990, një kryengritje popullore që çoi në përplasje dhe dhunë midis viteve 1987–1993.
Ai e filloi karrierën e tij në Kach, një organizatë ekstremiste e themeluar nga rabini amerikan Meir Kahane, e cila më vonë u nxor jashtë ligjit në vitin 1994 për pikëpamjet e saj raciste anti-muslimane dhe thirrjet e përsëritura për dhunë kundër palestinezëve.
Ai është dënuar tetë herë për krime dhune, nxitje të urrejtjes dhe mbështetje për akte terroriste. Ushtria e ndaloi nga shërbimi ushtarak sepse konsiderohej shumë ekstremist. Në moshën 18 vjeç, mosha në të cilën kërkohet shërbimi ushtarak, ai ishte raportuar tashmë për anëtarësim në grupe ekstremiste dhe për disa krime që lidheshin me aktivitetin e tij politik, dhe për këtë arsye u refuzua si problematik.
Në vitin 1995, fitoi famë kombëtare kur u shfaq në televizionin izraelit duke valëvitur emblemën e makinës së kryeministrit Yitzhak Rabin, i cili po çonte përpara një proces kompleks paqeje me palestinezët, që kulmoi me Marrëveshjet e Oslos të vitit 1993, të cilat u kundërshtuan fuqishëm nga e djathta ekstreme izraelite.
“Arritëm te makina e tij; do ta arrijmë edhe atë”, tha Ben-Gvir në televizion. Më 4 nëntor 1995, Rabin u vra nga një ekstremist i krahut të djathtë në fund të një demonstrate në mbështetje të Marrëveshjeve të Oslos.
Me profesion avokat, në vitet që pasuan ai u bë avokati i preferuar për ekstremistët hebrenj të akuzuar për krime urrejtjeje, terroriste dhe nacionaliste. Që atëherë, ai ka qenë një pikë referimi për organizatat izraelite të ekstremit të djathtë dhe kolonët që sulmojnë dhe përpiqen të zhvendosin popullsinë palestineze.
Pas gjashtë përpjekjeve të pasuksesshme, ai u zgjodh në parlamentin izraelit për herë të parë në vitin 2021, me partinë nacionaliste “Fuqia Hebraike” të ekstremit të djathtë. Në vitin 2022, në një listë të përbashkët me Partinë Fetare Sioniste, “Fuqia Hebraike” fitoi gjashtë vende (nga 120), të cilat rezultuan vendimtare në formimin dhe mbijetesën e mëvonshme të qeverisë së Netanyahut.
Edhe pse nga pozitat e pakicës, ai ndikoi fuqishëm në vendimet e qeverisë, të cilën e kishte braktisur përkohësisht pas armëpushimit të parë në Gaza, vetëm për t’u ribashkuar kur bombardimet rifilluan.
Në vitet 2023–2024, ai bëri vizita qartësisht provokuese në Malin e Tempullit në Jerusalem, kompleksin ku ndodhet Xhamia Al-Aksa, vendi i tretë më i shenjtë për myslimanët, por edhe me rëndësi të madhe fetare për hebrenjtë.
Që nga qershori i vitit 2025, disa qeveri perëndimore, përfshirë ato të Britanisë, Kanadasë dhe Australisë, kanë miratuar sanksione kundër Ben Gvir për mbështetjen e tij ndaj dhunës së kolonëve kundër palestinezëve në Bregun Perëndimor. /tesheshi
Burimi: mesazhi
Etiketa: Aktuale
