Komuniteti protestant në Kosovë po ndihet i diskriminuar pasi ka telashe të shumta që t’i varrosë të vdekurit. Protestantët duhet të kërkojë leje dhe ndodh që duhet të thërrasin edhe hoxhë për procedura fetare.

Problemet e këtij komuniteti i evidentoi edhe raporti për liritë fetare i Departamentit Amerikan të Shtetit, shtet që promovon këtë besim fetar në Kosovë.

Artur Krasniqi, pastor thotë se në Kosovë nuk ka tolerancë ndër fetare.

“Duhet ta gjesh ndonjë të njohshme. Do të thotë, duhet të mundohesh të gjesh një lloj solidarizim më së pari prej ndonjë zyrtari ose hoxhe në BIK”.

“Ndonjëherë ka ndodhur që ne kemi ftuar një hoxhë që ta kryejë pjesë e vet të ceremonisë, të kombinojë një ceremoni, të duket tolerant, të duket se jemi popull tolerant, mirëpo ne nuk besojmë se kjo është tolerancë”, ka thënë Krasniqi.

Varrezat në Dragodan jo vetëm që konsiderohen si varreza muslimane, por kuptohet dhe dihet që në varrezat muslimane nuk lejohet të varrosen të vdekurit e besimeve të tjera.

Protestantët e kanë të vështirë të varrosen këtu. Njëjtë është edhe në Gjakovë ata nuk janë lejuar të varrosen me kryq.

Zgjidhja e vetme është që protestantët duhet të formojnë varrezat e tyre e të mos kërkojnë të varrosen së bashku me muslimanët.