Ministria e Jashtme e Izraelit njoftoi se dy aktivistët e ndaluar nga flotilja humanitare që ishte nisur drejt Gazës janë deportuar nga vendi.

Në një deklaratë të publikuar në platformën X, ministria tha se aktivistët Saif Abu Keshek dhe Thiago Ávila u deportuan pas përfundimit të hetimeve ndaj tyre.

“Pas përfundimit të hetimeve, dy provokatorët profesionistë nga flotilja provokuese, Saif Abu Keshek dhe Thiago Ávila, u deportuan sot nga Izraeli,” thuhet në deklaratë.

Autoritetet izraelite shtuan se nuk do të lejojnë “asnjë shkelje të bllokadës detare të ligjshme ndaj Gazës”.

Aktivistët ishin pjesë e flotiljes humanitare që synon të dërgojë ndihma në Rripin e Gazës, mes vazhdimit të krizës humanitare në territorin palestinez. /mesazhi

Burimi: mesazhi