Lamine Yamal ka larguar çdo dilemë rreth gjendjes së tij fizike pas ndeshjes së parë të Spanjës në Kupën e Botës 2026, e cila përfundoi me barazim 0-0 ndaj Kepit të Gjelbër.

Sulmuesi i ri i Barcelonës, që së fundmi ishte rikuperuar nga një dëmtim, siguroi tifozët dhe stafin teknik se nuk po përballet me asnjë problem fizik dhe se është gati për vazhdimin e turneut.

“Gjithçka është perfekte”, u shpreh 18-vjeçari për SPORT, duke bërë të ditur se nuk ndjen asnjë shqetësim dhe se këmba e tij është në gjendje të mirë.

Deklarata e Yamalit ka sjellë lehtësim në kampin spanjoll, sidomos pas zhgënjimit që shkaktoi barazimi në ndeshjen e parë. Disa prej futbollistëve të rinj të ekipit, përfshirë Gavi, Nico Williams dhe Dani Olmo, nuk e fshehën pakënaqësinë pas përfundimit të takimit.

Megjithatë, portieri Unai Simón kërkoi qetësi dhe theksoi se gara sapo ka nisur, duke kujtuar se Kupa e Botës është një turne i gjatë ku çdo ndeshje sjell sfida të reja.

Ai vlerësoi edhe paraqitjen e Kepit të Gjelbër, që me organizimin e mirë në mbrojtje arriti të ndalë repartin ofensiv të Spanjës dhe të marrë një pikë të rëndësishme në debutimin e saj në këtë edicion të Botërorit.

Përfaqësuesja spanjolle tashmë e sheh si lajm pozitiv faktin që Yamal është në formë të plotë dhe i gatshëm për sfidat e radhës në garën më të madhe të futbollit botëror.

Burimi: 04online