Prishtinë – Ministria e Forcës së Sigurisë së Kosovës dhe Ministria e Mbrojtjes së Kroacisë do të nënshkruajnë plan bilateral për vitin 2015.

Ky nënshkrim do të bëhet gjatë vizitës që do të bëjnë ministri i ministrisë për Forcën e Sigurisë së Kosovës (MFSK), Haki Demolli dhe komandanti i FSK-së, gjenerallejtënant Rrahman Rama.

Që të dy janë ftuar nga ministri i Mbrojtjes, Ante Kotromanoviq për një vizitë dy ditore.

Demolli dhe Rama do të priten me nderime të larta shtetërore, fillimisht në ministrinë e Mbrojtjes të Kroacisë, ku do të zhvillohet takimi me ministrin kroat, Ante Kotromanoviq.

Në njoftimin e kësaj ministrie thuhet se Demolli dhe Rama do të takohen edhe me presidenten e Republikës së Kroacisë, Kolinda Grabar- Kitaroviq, kryetarin e Parlamentit, Josip Leko në Parlamentin kroat, dhe një varg vizitash në kazerma dhe ambiente ushtarake të Republikës së Kroacisë.

Kjo është vizita e parë zyrtare e delegacionit të ministrisë për Forcën e Sigurisë së Kosovës, në Republikën e Kroacisë, prej që ministri Haki Demolli dhe komandanti, gjeneral Rama kanë marrë drejtimin e ministrisë për FSK dhe FSK-së.