Miliarderi i teknologjisë, Elon Musk ka shprehur “keqardhje” për disa nga postimet e tij javën e kaluar në rrjetet sociale rreth presidentit të SHBA-së, Donald Trump, pas grindjes së tij me presidentin amerikan, transmeton Anadolu.

“Më vjen keq për disa nga postimet e mia rreth presidentit Donald Trump javën e kaluar. Ato shkuan shumë larg”, shkroi Musk në platformën sociale X.

Grindja publike midis Trumpit dhe Muskut shpërtheu javën e kaluar pasi presidenti e kritikoi miliarderin për kundërshtimin e një mase politike republikane për shkak të ndikimit të saj të parashikuar në deficit.

Përplasja u përshkallëzua shpejt, duke shkaktuar pasoja në Kongres dhe duke ndikuar në aksionet e kompanisë Tesla.

Mes tensioneve, Musk, shef ekzekutiv i kompanisë Tesla, ndau një seri postimesh në platformën X që shënjestronin Trumpin, duke përfshirë një postim tani të fshirë që i referohej lidhjeve të kaluara të Trumpit me abuzuesin seksual Jeffrey Epstein dhe madje hodhi edhe idenë e themelimit të një partie të re politike.

“Ne patëm një marrëdhënie të mirë, unë i uroj atij të gjitha të mirat, shumë të mira”, tha Trump të hënën duke shtuar se nuk e kishte konsideruar seriozisht nëse do të përgjigjej nëse Musk do ta telefononte.

“Mendoj se ai dëshiron të flasë me mua, mendoj se po”, shtoi Trump.