E enjte, 2 Prill 2026
Paqëndrueshmëria globale nuk e ndali rritjen e turizmit ndërkombëtar në vitin 2025. Përkundrazi, numri i udhëtarëve kaloi 1.5 miliardë, duke i tejkaluar nivelet para pandemisë.
Megjithatë, pyetja sot nuk është nëse gjeopolitika na bën të udhëtojmë më pak, por si i riformëson ajo flukset turistike. Një nga shembujt më të qartë gjendet në Gjirin Persik, një rajon që ka investuar miliarda dollarë për t’u bërë nyja kryesore lidhëse mes Evropës, Azisë dhe Afrikës.
Përpara se të fillonte lufta në Iran, Dubai priti pothuajse 20 milionë turistë, ndërsa Doha u emërua kryeqyteti i turizmit për vitin 2026. Por për të mbetur tërheqëse, këto vende duhet të garantojnë stabilitet, i cili tashmë është i rrezikuar seriozisht.
Në turizëm, perceptimi i rrezikut është po aq vendimtar sa rreziku real. Shumë udhëtarë nuk ndalojnë së udhëtuari, por ndryshojnë destinacionet drejt vendeve që i perceptojnë si më të sigurta dhe më të parashikueshme.
Kjo po vërehet tashmë në rajonet e prekura nga konflikti midis SHBA-së, Izraelit dhe Iranit, ku kërkesa është zhvendosur drejt alternativave të tjera. Për shembull, operatorët turistikë kanë rritur kapacitetet në Ishujt Kanarie, duke u tërhequr përkohësisht nga Lindja e Mesme.
Këto tendenca nuk diktohen nga kultura apo gastronomia, por nga faktorë si stabiliteti politik dhe lidhja ajrore. Pas shpërthimit të konfliktit në luftës në rajon në 28 shkurt, aeroportet kryesore në Dubai, Doha dhe Abu Dhabi u përballën me mbyllje ose kufizime të rënda.
Meqenëse Lindja e Mesme mbulon 14 për qind të trafikut ndërkombëtar të tranzitit, ky riorganizim ndikon në të gjithë botën.
Trafiku ajror po ridrejtohet drejt qendrave më të qëndrueshme operacionalisht, si Aeroporti i Stambollit, i cili po përforcon rolin e tij si pikë globale tranziti duke tërhequr pasagjerët që më parë fluturonin përmes Dubait.
Kjo zhvendosje bart pasoja të mëdha ekonomike. Më shumë ndalesa në Stamboll do të thonë më shumë qëndrime me netë dhe shpenzime në ekonominë lokale turke. Kostoja ekonomike është e drejtpërdrejtë.
Këshilli Botëror i Udhëtimit dhe Turizmit vlerëson se konflikti SHBA-Izrael-Iran po shkakton një humbje ditore prej rreth 600 milionë dollarësh. Këto kosto në fund u kalojnë udhëtarëve përmes biletave më të shtrenjta dhe udhëtimeve më të gjata.
Gjithashtu, po ndryshon edhe sjellja e turistëve. Rezervimet me kushte fleksibile anulimi dhe sigurimet e udhëtimit janë bërë prioritete absolute. Në vitin 2025, kompania Allianz pa një rritje prej nëntë për qind në xhiron e sigurimeve në Spanjë, ku anulimet përbënin gjysmën e kërkesave.
Suksesi i destinacioneve si Dubai dhe Abu Dhabi ishte ndërtuar mbi luksin, efikasitetin dhe sigurinë. Nëse zhduken këto, atëherë harta e turizmit do të rivizatohet plotësisht. Fituesit e rinj nuk do të jenë domosdoshmërisht destinacionet më spektakolare, por ato që ofrojnë përvojën më të qetë dhe më pak pasiguri.
Gjeopolitika nuk po e shkatërron turizmin global, por po krijon një sistem më të fragmentuar, ku stabiliteti është monedha më e shtrenjtë. /tesheshi.com/
Burimi: tesheshi
