Arabia Saudite dhe Katari kanë dërguar anijet e tyre me naftë në drejtim të Egjiptit, duke përmbushur zotimin e tyre për të ndihmuar vendin që është duke u udhëhequr nga grusht shteti ushtarak. Pasi përshëndetën largimin e presidentit Muhamed Mursi, vendet arabe ishin zotuar për të ndihmuar Egjiptin me rezerva të naftës dhe me të holla, duke qenë se vendi përveç krizës politike është po përballet edhe me probleme ekonomike.

Lajmin për prurjen e sasive të mëdha të naftës e bëri të ditur Ministri i Karburanteve Sherif Ismail.

“Ne kemi marrë pjesën e parë të karburantit dhe dërgesave të tjera me naftë në fillim të këtij muaji,” tha Ismail për Anadolu Agency.

Ministri nuk dha detaje të mëtejshme, por pohoi se dërgesat do të ndihmojnë mbulimin e nevojave për tregun egjiptian të energjisë.

Dërgesat janë pjesë e paketës miliarda dollarëshe të premtuar nga Arabia Saudite për administratën e re në Egjipt, pas rrëzimit të presidentit Muhamed Mursi më 3 korrik.

Kjo përfshin 2 miliard dollarë depozita, një miliardë dollarë grante dhe 2 miliardë dollarë produkte të naftës.

Egjipti shpenzon 6 milion dollarë në muaj për importet e produktit të energjisë për të përmbushur kërkesat në rritje të tregut vendor, i cili aktualisht konsumon rreth 500.000 ton naftë dhe karburante.