75 anëtarë të Parlamentit të Mbretërisë së Bashkuar kanë nënshkruar një mocion urgjent, duke i bërë thirrje qeverisë britanike të ndërmarrë veprime ndaj autoriteteve izraelite për planet e aneksimit të pjesëve të Bregut Perëndimor të pushtuar dhe shkeljet e vazhdueshme të së drejtës ndërkombëtare.

Sipas agjencisë palestineze të lajmeve WAFA, mocioni dënon një vendim izraelit të muajit shkurt për të legalizuar konfiskimin e tokave palestineze dhe regjistrimin e tyre si pronë shtetërore, duke e cilësuar atë të paligjshëm dhe si një përpjekje për zgjerimin e konfiskimeve të tokës.

Dokumenti i referohet gjithashtu opinionit këshillimor të Gjykatës Ndërkombëtare të Drejtësisë të publikuar në korrik 2024, i cili konstaton se pushtimi izraelit i territoreve palestineze është i paligjshëm dhe kërkon përfundimin e menjëhershëm të tij.

Deputetët britanikë i kërkojnë qeverisë që të përmbushë detyrimet ndërkombëtare, duke ndalur çdo mbështetje që mund të kontribuojë në vazhdimin e pushtimit dhe duke ndaluar tregtinë që lidhet me vendbanimet në territoret e pushtuara. /mesazhi

Burimi: mesazhi