Komanda Qendrore e Shteteve të Bashkuara (CENTCOM) njoftoi të dielën se anija desantuese USS Rushmore po zhvillon operacione bllokade kundër Iranit në Detin Arabik.

Në një deklaratë të publikuar në platformën X, CENTCOM bëri të ditur se marinarët dhe marinsat në bord të anijes po kryejnë misione në zonë në kuadër të këtyre operacioneve.

Në një postim të veçantë, komanda shtoi se shkatërruesi me raketa të drejtuara USS Pinckney po zhvillon patrullime intensive në mbështetje të operacioneve, duke theksuar se bllokada ka ndalur trafikun detar tregtar drejt dhe nga Irani.

Këto zhvillime vijnë pas vendimit të Iranit për të mbyllur sërish Ngushticën e Hormuzit të shtunën. Teherani njoftoi gjithashtu se kontrolli mbi këtë rrugë strategjike është rikthyer në statusin e mëparshëm, nën mbikëqyrje të rreptë të forcave të armatosura iraniane, ndërsa shumica e anijeve që kalojnë në ujërat territoriale do të duhet të paguajnë tarifa. /mesazhi

Burimi: mesazhi