Qeveritë e Brazilit, Meksikës dhe Spanjës kanë bërë thirrje për veprim urgjent ndërkombëtar për të adresuar situatën humanitare në Kubë, duke theksuar nevojën për respektimin e së drejtës ndërkombëtare dhe Kartës së Kombeve të Bashkuara.

Në një deklaratë të përbashkët të publikuar nga Ministria e Jashtme e Spanjës, tre vendet shprehën shqetësim për përkeqësimin e kushteve të jetesës në Kubë dhe u kërkuan të gjitha palëve të shmangin veprime që mund ta përkeqësojnë më tej situatën ose të shkelin të drejtën ndërkombëtare.

Ato theksuan gjithashtu rëndësinë e respektimit të sovranitetit shtetëror, integritetit territorial dhe zgjidhjes paqësore të mosmarrëveshjeve, pa ndërhyrje të jashtme.

Tre vendet ripërsëritën thirrjen për dialog të bazuar në të drejtën ndërkombëtare dhe Kartën e OKB-së, me synim gjetjen e zgjidhjeve afatgjata që garantojnë të drejtën e popullit kuban për vetëvendosje.

Kjo thirrje vjen në një kohë kur Kuba po shqyrton masa reformash ekonomike përballë presioneve në rritje politike dhe ekonomike, të cilat kanë ndikuar në rritjen e emigrimit dhe sfidave sociale.

Më herët këtë vit, administrata e presidentit amerikan Donald Trump vendosi kufizime të reja ndaj sektorit të naftës në Kubë, në kuadër të një strategjie të quajtur “presion maksimal”. Këto masa kanë shtuar vështirësitë ekonomike, përfshirë mungesat e ushqimit, ilaçeve dhe karburantit, si dhe ndërprerjet e energjisë elektrike. /mesazhi

Burimi: mesazhi