Ministri izraelit i Sigurisë Kombëtare, Itamar Ben-Gvir, deklaroi se nuk do të ndryshojë politikat e tij ndaj palestinezëve, pas raportimeve se Gjykata Ndërkombëtare Penale po shqyrton mundësinë e lëshimit të një urdhër-arresti ndërkombëtar ndaj tij.

Sipas raportimeve të medias, në GJNP është paraqitur një kërkesë për urdhër-arrest ndaj Ben-Gvirit dhe ministrit izraelit të Financave, Bezalel Smotrich, nën dyshimet për krime lufte dhe krime kundër njerëzimit ndaj palestinezëve në Bregun Perëndimor të pushtuar.

Deri tani, as GJNP-ja dhe as qeveria izraelite nuk kanë dhënë një koment zyrtar lidhur me këto raportime.

“Nuk kam frikë dhe nuk do të tërhiqem. Asnjë urdhër nga Haga nuk do të më pengojë të vazhdoj politikën time kundër terroristëve”, tha Ben-Gvir në një deklaratë.

Ai shtoi se nuk do të kërkojë falje dhe nuk do të ndalojë veprimet e tij, pavarësisht presionit ndërkombëtar.

Organizata palestineze dhe ndërkombëtare për të drejtat e njeriut kanë kërkuar vazhdimisht hetime ndaj Ben-Gvirit, duke e akuzuar për deklarata nxitëse kundër palestinezëve dhe për mbështetjen e masave të ashpra ndaj të burgosurve palestinezë.

Në nëntor 2024, GJNP lëshoi urdhër-arreste ndaj kryeministrit izraelit Benjamin Netanyahu dhe ish-ministrit të Mbrojtjes Yoav Gallant, nën akuza për krime lufte dhe krime kundër njerëzimit në Gaza.

Sipas autoriteteve palestineze, që nga tetori 2023, lufta në Gaza ka shkaktuar mbi 72 mijë viktima dhe më shumë se 172 mijë të plagosur, ndërsa në Bregun Perëndimor sulmet e ushtrisë izraelite dhe kolonëve kanë lënë mbi 1,100 palestinezë të vrarë dhe mijëra të tjerë të plagosur. /mesazhi

Burimi: mesazhi