Ministri i Jashtëm i Spanjës, Jose Manuel Albares, kritikoi ashpër politikat e qeverisë izraelite dhe tha se njohja e shtetit palestinez është e domosdoshme për të ruajtur zgjidhjen me dy shtete, raporton Anadolu.

“Nuk besoj se do të ketë siguri, paqe dhe stabilitet në Lindjen e Mesme nëse nuk zbatojmë zgjidhjen me dy shtete”, tha Albares gjatë një paneli diskutimi në Qendrën “Jacques Delors” në Shkollën Hertie në Berlin.

Ai kritikoi politikat e qeverisë së Benjamin Netanyahut në Gaza dhe Bregun Perëndimor, duke treguar për rritjen e dhunës nga ekstremistët izraelitë, dhe tha se vendimi i Spanjës për të njohur Palestinën, i ndjekur më vonë nga disa vende evropiane, ishte i domosdoshëm.

“Kur e shihni situatën në Gaza, cila është faza e dytë e planit të paqes? Askush nuk e di. Vendbanimet e paligjshme në Bregun Perëndimor po zgjerohen gjithnjë e më shumë. Dhuna e kolonëve ka dalë jashtë kontrollit”, tha ai.

“Në fund, njohja e shtetit të Palestinës është mjeti më i mirë, pothuajse i vetmi që kemi për të mbrojtur zgjidhjen me dy shtete. Jemi vetëm dy hapa larg që kjo të bëhet pothuajse e pamundur”, paralajmëroi Albares.

Ai theksoi se ringjallja e përpjekjeve diplomatike dhe rifillimi i negociatave për një zgjidhje me dy shtete mbeten mënyra e vetme për të garantuar siguri dhe një të ardhme paqësore si për palestinezët, ashtu edhe për izraelitët.

Spanja njohu shtetin e Palestinës në vitin 2024. Në vitin 2025, disa vende të tjera evropiane, përfshirë Francën, Mbretërinë e Bashkuar dhe Belgjikën, ndoqën të njëjtin hap.

Megjithatë, Gjermania ka mbetur gjithnjë e më e izoluar në Evropë për këtë çështje, me qeverinë e kancelarit Friedrich Merz që këmbëngul se njohja duhet të vijë vetëm në fund të një procesi paqeje.

Burimi: mesazhi