Hapësirat nëntokësore të panjohura të Shën Sofisë në Stamboll po dalin gradualisht në dritë, të cilat Turqia planifikon t’i hapë për vizitorët për herë të parë. Njoftimi u bë nga ministri turk i Kulturës dhe Turizmit, Mehmet Nuri Ersoy, duke prezantuar progresin e punës së gjerë restauruese të monumentit historik.

Ai, duke folur pas hapjes së Festivalit të Rrugës Kulturore të Antalias, vuri në dukje se hapësirat nëntokësore të Shën Sofisë janë të paktën po aq interesante sa ato mbitokësore.

Ersoy i përshkroi ndërhyrjet si të paprecedentë për historinë moderne të monumentit, duke theksuar se ato po kryhen nën mbikëqyrje shkencore. “Po kryejmë projektet më gjithëpërmbajtëse të restaurimit, konservimit dhe përforcimit në historinë e Republikës në Shën Sofi. Profesorët tanë në komitetin shkencor thonë se këto projekte janë ndër ndërhyrjet më gjithëpërmbajtëse që nga koha e arkitektit Sinanit.”

Ministri turk njoftoi se planifikon fillimisht t’ua prezantojë punimet nëntokësore gazetarëve dhe më pas të lejojë aksesin e publikut, me kusht që të sigurohen kushtet e duhura. “Meqenëse Shën Sofia është një trashëgimi kulturore e vlefshme, çdo hap që ndërmarrim i nënshtrohet kontrollit shkencor. Duke e mbajtur Shën Sofinë të hapur për adhurim dhe vizita, po kryejmë punë mekanike jashtëzakonisht delikate që do të mbrojnë sigurinë dhe strukturën origjinale të strukturës.” /tesheshi.com/

Burimi: tesheshi