E enjte, 11 Qershor 2026
Mohamed Salahu i ka dhënë dritën jeshile për t’iu bashkuar një klubi të ri pas Kupës së Botës, pas largimit të tij nga Liverpooli, sipas raportimeve.
Salahu u largua nga Liverpooli me marrëveshje të ndërsjellë pas ndeshjes së fundit të sezonit 2025/26 në Premierligë.
Ai kishte nënshkruar një kontratë dyvjeçare në prillin e kaluar, por të dyja palët ranë dakord ta ndërprisnin atë një sezon më herët.
Sulmuesi egjiptian deklaroi për “beIN Sports” pas ndeshjes së tij të fundit me “The Reds” se ishte “ende duke vlerësuar opsionet”, dhe se do ta merrte vendimin e tij pas Kupës së Botës, përveç nëse do të shfaqej një “mundësi e mirë” më herët.
Salahu është lidhur fort me një transferim në një klub të Ligës Profesionale Saudite, e cila kishte tentuar ta transferonte atë në verën e vitit 2024.
Megjithatë, tani ai thuhet se i ka dhënë “dritën jeshile” një transferimi te një klub surprizë në Evropë.
Kandidati për president të Fenerbahçes, Aziz Yıldırım, kishte deklaruar se do të tentonte ta transferonte Salahun nëse do të rizgjidhej javën e kaluar.
Ai u tha gazetarëve: “Do të kërkonte një kontratë trevjeçare dhe kostoja totale do të ishte 90 milionë euro. Nëse ai është nevoja jonë urgjente, do ta transferojmë! Komiteti ynë i futbollit do të vendosë për këto çështje”.
Komentet e Yıldırımit duhen marrë me rezervë, pasi rivali i tij Hakan Safi kishte premtuar gjithashtu transferimin e Mason Greenwoodit, ndërsa kishte spekulime edhe për një kalim të Robert Lewandowskit te klubi pas skadimit të kontratës së tij me Barcelonën.
Yıldırımi fitoi garën presidenciale dhe u emërua president i Fenerbahçes për herë të dytë më 7 qershor.
Ai kishte drejtuar më parë klubin nga viti 1998 deri në vitin 2018, para se të zëvendësohej nga Ali Koç.
Deklaratat e tij për Salahun u mbështetën edhe nga Ertan Torunoğulları, i cili kishte punuar me drejtuesit e mëparshëm të Fenerbahçes nën Sadettin Saranin.
Ai zbuloi se Salahu ishte “shumë i interesuar” për t’u transferuar në Turqi dhe se kishte zhvilluar “takime jashtëzakonisht pozitive” me tashmë ish-yllin e Liverpoolit.
Salahu është përfshirë në listën prej 26 lojtarësh të Egjiptit për Kupën e Botës 2026, si kapiten i ekipit.
Kombëtarja afrikane është shortuar në Grupin G, ku do të përballet me Belgjikën, Zelandën e Re dhe Iranin.
Ndeshja e parë kundër Belgjikës zhvillohet në Seattle më 15 qershor, përpara se Egjipti të udhëtojë drejt Kanadasë, një prej vendeve organizatore, për t’u përballur me Zelandën e Re në Vancouver më 21 qershor.
Ndeshja e fundit e grupit për Egjiptin do të jetë kundër Iranit më 26 qershor, sërish në Seattle./Express
Burimi: 04online
