Prishtinë – Drejtori i Përgjithshëm i Policisë, Shpend Maxhuni ka pritur në një takim ambasadorin Amerikan, Greg Delawie, si dhe zyrtarët nga misioni i ICITAP, Bill Bochtere dhe Ron Fisher.

Sipas një njoftimi të Policisë së Kosovës, në takimin e mbajtur u diskutua për situatën aktuale në vendin tonë, si dhe ngjarjet dhe protestat e kaluara.

“Ambasadori Delawie shprehu impresionimin e tij me qasjen e Policisë së Kosovës në menaxhimin e protestave dhe vlerësojë shumë lartë qasjen profesionale dhe dedikimin e Policisë së Kosovës ndaj qytetarëve të saj”, thuhet në njoftim sipas Telegrafi.

Temë e diskutimit në këtë takim përveç tjerash, sipas njoftimit, ishte edhe lufta kundër terrorizmit, radikalizmit dhe ekstremizmit të dhunshëm, mbështetja dhe bashkëpunimi i pa kursyer nga Ambasada Amerikane në luftën kundër krimit të organizuar, korrupsionit dhe krimeve kibernetike.

Në këtë kuadër theksohet se u potencua ngritja e kapaciteteve në disa fusha të caktuara.

“Gjithashtu gjatë takimit u potencua edhe qasja profesionale e PK-së në disa raste me qytetarët amerikanë që kanë qëndruar në vendin tonë dhe besimi që është shprehur për PK-në në zgjidhjen e rasteve të caktuara dhe për këtë ambasadori shprehu mirënjohjen e tyre”.

“Ambasadori Delawie edhe njëherë konfirmoj mbështetjen dhe përkrahjen për Policinë e Kosovës me të gjitha kapacitetet në rrugën e saj për ofrimin e sigurisë dhe rendit për të gjithë qytetarët e saj, dhe vlerësimin se Policia e Kosovës është njëra ndër policit me profesionale në rajon”.

“Njëkohësisht Drejtori i Përgjithshëm, Maxhuni e falënderoi ambasadorin Delawie për përkrahjen e vazhdueshme që po jep Ambasada Amerikane në Prishtinë për Policinë e Kosovës”, përfundohet në njoftim.