Më shumë se 1.5 milionë haxhilerë nga jashtë kanë mbërritur në Arabinë Saudite për kryerjen e Haxhit, duke tejkaluar numrin e vizitorëve ndërkombëtarë të vitit të kaluar, pavarësisht tensioneve dhe luftës së fundit në Lindjen e Mesme.

Sipas autoriteteve saudite, deri të premten në mbrëmje në vend kishin hyrë 1,518,153 haxhilerë nga jashtë mbretërisë. Zyrtarët presin që ky numër të rritet edhe më shumë në ditët në vijim, para fillimit zyrtar të ritualeve të Haxhit.

Vitin e kaluar, në Haxh morën pjesë gjithsej 1,673,320 besimtarë, prej të cilëve 1,506,576 ishin nga jashtë Arabisë Saudite.

Përshkallëzimi i konfliktit pas sulmeve amerikane dhe izraelite ndaj Iranit në fund të shkurtit shkaktoi sulme iraniane ndaj objektivave në Arabinë Saudite dhe vendet e tjera të Gjirit, duke sjellë ndërprerje të trafikut ajror dhe rritje të kostove të udhëtimit.

Megjithatë, mijëra haxhilerë nga e gjithë bota nuk hoqën dorë nga udhëtimi për në Mekë. Shumë prej tyre deklaruan se besimi i tyre ishte më i fortë se frika nga pasiguria rajonale.

Edhe pse disa vende perëndimore, përfshirë Shtetet e Bashkuara dhe Australinë, këshilluan qytetarët e tyre të rishqyrtonin udhëtimet në rajon, haxhilerët vazhduan të mbërrijnë në qytetin e shenjtë.

Haxhi është një nga pesë shtyllat e Islamit dhe duhet të kryhet të paktën një herë në jetë nga çdo mysliman që ka mundësi fizike dhe financiare për ta realizuar. /mesazhi

Burimi: mesazhi