Gjykata Themelore në Ferizaj, ka shpall aktgjykim dënues ndaj të pandehurës M.A., për shkak të veprave penale “keqtrajtim apo braktisja e fëmijës” dhe “lëndimi i lehtë trupor”.

Sipas njoftimit, pas mbajtjes së shqyrtimit gjyqësor dhe administrimit e të gjitha provave personale dhe materiale, të pandehurën M.A. gjykata e shpalli fajtore dhe të njëjtën e gjykoi për veprën penale “keqtrajtim apo braktisja e fëmijës” me dënim burgimi në kohëzgjatje prej njëmbëdhjetë (11) vite i cili dënim do të ekzekutohet pas plotfuqishmërisë së këtij aktgjykimi.

Ndërsa për veprën penale “lëndimi i lehtë trupor”, e pandehura është dënuar me burgim në kohëzgjatje prej gjashtë muajsh, dënim i cili, me pëlqimin e të pandehurës, i është zëvendësuar me dënim me gjobë në shumë prej 6 mijë euro.

“Në bazë të nenit 76 paragrafi 2 të KPRK-së, të pandehurën e gjykoi me dënim unik burgimi në kohëzgjatje prej njëmbëdhjetë (11) muaj, në të cilin dënim do t`i llogaritet koha e kaluar në arrest shtëpiak, si dhe dënim me gjobë në shumë prej gjashtëmijë (6.000.00) €. Gjithashtu, konform nenit 63 paragrafi 2 lidhur me paragrafin 1 të KPRK-së të pandehurës i shqipton dënim plotësuese ndalimi i ushtrimit të profesionit, veprimtarisë apo detyrës së edukatores në kohëzgjatje prej pesë (5) vite”, u tha në njoftimin e gjykatës, raporton Klan Kosova.

Sipas gjykatës, e pandehura M.A. akuzohet se më datë 4 nëntor 2025 dhe 5 nëntor 2025, “në vazhdimësi, në intervalin kohor nga ora 09:00 deri më 14:30 në një kopsht të fëmijëve ‘M.’ në Ferizaj, e pandehura ka keqpërdor të drejtat e saj të cilat i kishte si edukatore, e të cilës i ishin besuar në ruajtje, edukim dhe kujdes dy fëmijët e moshës 2 vjeçare, pra me dashje i ka keqtrajtuar ata duke përdorur masa fizike dhe mendore, duke i detyruar me dhunë për të fjetur, duke i shtyrë, tërhequr për flokë dhe përplasur për dysheme të dëmtuarit – fëmijët, me të cilin veprim ka kryer në vazhdim veprën penale keqtrajtim apo braktisja e fëmijës nga neni 243 paragrafi 1 lidhur me nenin 77 të Kodit Penal të Republikës së Kosovës”.

“Më datë 5 nëntor 2025, në intervalin kohor nga ora 09:00 deri më 14:30 në Ferizaj, në një kopsht të fëmijëve ‘M.’ në Ferizaj, e pandehura e sulmon me dashje njërin të dëmtuar fëmijë dy vjeçar, pra viktimë e ndjeshme, i cili asaj iu kishte besuar në ruajtje, edukim dhe kujdes në atë mënyrë që e kap për flokë e tërheqë duke ia dëmtuar – shkulur flokët si dhe duke ia dëmtuar lëkurën në atë pjesë të kokës, pra duke i shkaktuar lëndime të lehta trupore – gjendje pas kontuzionit (ndrydhjes) në kokë, lëndime këto të përshkruara në akt ekspertimin mjeko – ligjor të datës 25 nëntor 2025, me të cilin veprim ka kryer veprën penale lëndimi i lehtë trupor nga neni 185 paragrafi 1 nën paragrafi 3.1 të Kodit Penal të Republikës së Kosovës”, ka thënë Gjykata.

Burimi: klankosova