E premte, 15 Maj 2026
Gjashtë parti dhe lëvizje serbe në Kosovë janë bashkuar në një koalicion të ri politik me emrin “Së bashku fitojmë”, për të garuar në zgjedhjet e ardhshme parlamentare në Kosovë.
Koalicioni përbëhet nga Demokracia Serbe, Lëvizja Popullore Serbe, iniciativat qytetare “Veriu për të Gjithë” dhe “Rrënjët”, Aleanca për Kosovën dhe “Fytyra e Re”.
Në deklaratën e tyre të parë të përbashkët, përfaqësuesit e koalicionit thanë se bashkimi erdhi si rezultat i “seriozitetit të momentit politik” dhe pozitës së komunitetit serb në Kosovë.
Sipas tyre, uniteti, përgjegjësia dhe veprimi i përbashkët janë të domosdoshme për ndërtimin e një fronti më të fortë politik në skenën serbe në Kosovë.
Ky koalicion synon të paraqitet si një alternativë e tretë politike, përballë Lista Serbe, e cila mbështetet nga Beogradi, dhe partisë së Nenad Rašić, “Për Liri, Drejtësi dhe Mbijetesë” (ZSPO), që aktualisht është pjesë e institucioneve në Prishtinë.
Analisti politik Dušan Janjić, në një prononcim për mediumin serb Danas, tha se zgjedhjet e ardhshme do të jenë një provë e rëndësishme për serbët në Kosovë.
Sipas tij, qytetarët serbë duhet të vendosin nëse do të vazhdojnë të presin “fundosjen e anijes dhe më pas të largohen”, apo do të marrin përgjegjësinë politike në duart e tyre.
Janjić vlerësoi se koalicioni i ri mund të synojë elektoratin që dikur përfaqësohej nga politikani i ndjerë Oliver Ivanović.
Megjithatë, ai shtoi se ndikimi financiar i Beogradit mbi serbët në Kosovë vazhdon të jetë i madh, ndërsa përmendi edhe ndikimin e strukturave të lidhura me Milan Radoičić dhe Zvonko Veselinoviqin, të cilat sipas tij vazhdojnë të mbështesin Lista Serbe.
Analisti serb tha se koalicioni “Së bashku fitojmë” përballet me një sfidë të vështirë në zgjedhjet e 7 qershorit, por shtoi se sigurimi i disa ulëseve në Kuvend do të ishte i rëndësishëm për krijimin e një përfaqësimi më të gjerë politik të serbëve në Kosovë.
Ai gjithashtu theksoi se Nenad Rašić pritet të ruajë mbështetjen në rajonin e Anamoravës, duke pasur parasysh përvojën e tij politike dhe pjesëmarrjen në institucionet e Kosovës.
Në fund, Janjić tha se këto zgjedhje mund të përcaktojnë nëse serbët në Kosovë do të vazhdojnë të mbështeten te politika aktuale e Beogradit apo do të kërkojnë një qasje të re politike dhe institucionale në Kosovë.
Burimi: mesazhi
Etiketa: Aktuale
