Një zhvillim që është parë si projekt destabilizimi në Europë

Dokumentet e rrjedhura tregojnë, sipas portalit estonez Delfi dhe rrjetit hetimor OCCRP, lidhjen e supozuar të shërbimit të inteligjencës ruse me veprime provokuese që synojnë të shkaktojnë tensione dhe të destabilizojnë vendet evropiane.

Ndër detajet më tronditëse është operacioni i quajtur ‘Koka derri’, gjatë të cilit koka derri të prera me emrin e Presidentit francez Emmanuel Macron të shkruar mbi to u lanë para xhamive në Paris.

Sipas dokumenteve të rrjedhura, qëllimi i operacionit ishte të nxiste urrejtje, trazira dhe përçarje brenda shoqërisë franceze. Aksioni dyshohet se u organizua si pjesë e një strategjie më të gjerë të “sulmit njohës”, i cili do të thellonte përçarjet politike dhe sociale në shtetet anëtare të NATO-s.

Dokumentet thonë se një grup prej gjashtë operativësh nga Serbia mbërriti në Paris në shtator të vitit të kaluar, ku më parë kishin vëzhguar disa xhami që ishin shënuar si “shënjestra” në komunikimet e brendshme.

Gjatë natës, ata dyshohet se lanë koka derri përpara nëntë xhamive, pas së cilës u larguan nga Franca. Autoritetet franceze kishin njoftuar më parë se tre shtetas serb ishin dënuar për pjesëmarrjen e tyre në operacion, duke arritur në përfundimin se ata kishin vepruar me urdhër të “strukturave të inteligjencës së Federatës Ruse”.

Dokumentet zbulojnë gjithashtu operacione të tjera të planifikuara, duke përfshirë vandalizimin e një monumenti të Charles de Gaulle në Paris për t’ia hedhur fajin nacionalistëve ukrainas, pastaj lëshimin e dhjetëra kukullave seksi në lumin Sena me mesazhe anti-migrante dhe vendosjen e skeleteve plastike pranë Memorialit të Holokaustit në Berlin.

Në Gjermani, sipas të njëjtave akuza, përmendet edhe një veprim në të cilin makinat u sabotuan me shkumë që zgjerohej, me një përpjekje për t’i atribuuar përgjegjësinë aktivistëve mjedisorë.

Sipas mediave të huaja, operacionet u koordinuan nga një person nën pseudonimin “Kristin Keeler”, e cila thuhet se është Sofia Zakharova, një zyrtare e lartë në administratën e Presidentit rus Vladimir Putin.

Disa mesazhe përmendin gjithashtu pritjen e “dritës jeshile” nga Sergei Kiriyenko, një nga bashkëpunëtorët më të ngushtë të Putinit, gjë që forcoi më tej dyshimet se operacione të caktuara u miratuan në nivelin më të lartë të Kremlinit. /tesheshi

Burimi: mesazhi