Kryeministri i Izraelit, Benjamin Netanyahu, ka deklaruar se ushtria izraelite po zgjeron operacionet e saj në Libanin jugor dhe ka paralajmëruar se sulmet do të vazhdojnë.

Në një deklaratë të publikuar në rrjetet sociale, Netanyahu tha se forca të mëdha izraelite po veprojnë thellë brenda territorit libanez, duke marrë nën kontroll zona strategjike dhe duke forcuar atë që e quajti një “zonë sigurie”.

Ai po ashtu theksoi se gjatë periudhës së armëpushimit të ndërmjetësuar nga Shtetet e Bashkuara në mesin e prillit, ushtria izraelite ka vrarë qindra luftëtarë të Hezbollah.

Deklaratat e Netanyahut erdhën në një ditë kur sulmet izraelite në jug të Libanit shkaktuan vdekjen e 31 personave dhe plagosjen e 40 të tjerëve.

Kryeministri izraelit tha gjithashtu se po udhëheq një përpjekje të gjerë për t’iu kundërvënë dronëve të Hezbollahut, përfshirë dronët sulmues të drejtuar përmes kabllove me fibër optike, të cilët së fundmi kanë shkaktuar humbje në radhët e forcave izraelite.

“Kundër Hezbollahut nuk ndalemi së luftuari asnjë çast dhe do të ketë edhe më shumë veprime derisa të garantohet siguria e plotë e qytetarëve të Izraelit”, deklaroi Netanyahu. /mesazhi

Burimi: mesazhi