Prizren Post - Nga qendra e Ballkanit!

Erdogan për sulmin në Ankara: Qëllimi, prishja e unitetit të Turqisë

Prizren Post | 21:52 - 10.10.2015

Presidenti i Turqisë, Recep Tayyip Erdogan, reagoi në lidhje me sulmin terrorist me bombë në Ankara.

“Dënoj ashpër këtë sulm barbarë i cili është bërë për të prishur unitetin dhe qetësinë e vendit tonë. Ne jemi kundër çdo organizate terroriste apo akti terrorist, pa bërë dallime burimi, synimi apo emri”, raporton Anadolu Agency (AA).

“Jam trishtuar kur mësova këtë sulm barbarë në stacionin e trenit në Ankara ku humbën jetën shumë qytetarë të vendit tonë”, tha Erdogan.

“Jemi të prirur të jemi të gjithë së bashkë kundër këtyre sulmeve. Ata të cilët veprojnë me standarde të dyfishta janë ata që i japin ndihmën më të madhe organizatave terroriste dhe sulmeve të tyre. Nuk ka asnjë dallim mes sulmeve terroriste të mëparshme ndaj ushtrisë, policisë, popullatës civile, rojeve të sigurisë me sulmin e sotëm. Ne si popull, veçanërisht, partitë politike, shoqëria civile dhe media duhet të qëndrojmë me një sensibilitet përballë këtyre sulmeve”, deklaroi Erdogan.

“Qëndrimi jonë i përbashkët dhe i palëkundur kundër këtij sulmi do të jetë përgjigja më kuptimplotë që i japim organizatave terroriste dhe sulmeve të tyre. Synimi i këtij sulmi është të fusë në një përplasje shtresa dhe grupime të ndryshme të shoqërisë. Në këtë kontekst ftoj çdokënd të tregojë sjellje të kontrolluar dhe të ndjeshme ndaj këtyre ngjarjeve. Shteti jonë është duke punuar për zbardhjen e plotë të kësaj ngjarjeje. Jam i bindur se në një kohë shumë të shkurtër personat përgjegjës do të vihen përpara drejtësisë. Unë shpreh mëshirën e Allahut për të vdekurit dhe ngushëllimet për familjarët që humbën të afërmit e tyre në sulmet”, shprehet Erdogan.


Arivisti Company