E shtunë, 1 Gusht 2026
Përpjekja e Beşiktaşit për të transferuar Mohamed Salahun raportohet se është penguar nga një tjetër klub turk, dhe nuk bëhet fjalë as për Galatasarayn e as për Fenerbahçen.
Salah mbetet lojtar i lirë pasi kontrata e tij me Liverpoolin skadoi në muajin qershor, duke i dhënë fund qëndrimit të tij të suksesshëm në “Anfield” pas nëntë vitesh.
Egjiptiani u largua si një nga futbollistët më të mëdhenj në historinë e klubit.
Është raportuar gjerësisht se 34-vjeçari po kërkohet nga klubet e Ligës Profesionale Saudite, me Al Hilal që konsiderohet favorit për ta transferuar gjatë kësaj vere.
Të premten (31 korrik), mediumi turk “Turkiye Today” raportoi se Al Ittihad ka intensifikuar interesimin për Salahun, pasi më parë kishte parë një ofertë prej 150 milionë funtesh të refuzohej nga Liverpooli në shtator të vitit 2023.
Sipas raportimeve, Al Qadsiah është i vetmi klub tjetër saudit që ka mundësi financiare për ta realizuar transferimin e Salahut, ndërsa Al Nassr i Cristiano Ronaldos dhe Al Ahli nuk janë të interesuar.
Dy javë më parë, agjenti i Salahut, Ramy Abbas Issa, publikoi një mesazh në platformën “X”, duke lënë të kuptohet se e ardhmja e sulmuesit do të sqarohej shumë shpejt.
“Ende nuk e dimë se ku do të luajë Mohamed sezonin e ardhshëm, por mund ta mësojmë shumë shpejt. Nuk është në stilin tonë të zhvillojmë bisedime me klube ku Mohamed nuk dëshiron të luajë, vetëm sa për të krijuar zhurmë”, tha ai.
Ky reagim erdhi pas një postimi të mëhershëm të Abbas më 24 maj, ku ai shkruante: “Nuk e dimë se ku do të luajë Mohamed sezonin e ardhshëm. Kjo do të thotë se askush tjetër nuk e di. Kini kujdes nga ata që kërkojnë klikime dhe vëmendje”.
Përveç interesimit nga klubet saudite, edhe Beşiktaşi zhvilloi bisedime për ta transferuar Salahun.
Sipas “ESPN”, klubi turk madje i paraqiti një ofertë zyrtare futbollistit, ndërsa drejtori sportiv i Beşiktaşit, Önder Özen, dha një përditësim gjatë një konference për media në fillim të kësaj jave.
“Oferta e Beşiktaşit, e bërë sipas kushteve tona, është ende në tavolinë. Nëse vjen një përgjigje ndaj kësaj oferte, ajo mund të shqyrtohet. Por Beşiktaşi nuk do të bëjë një ofertë tjetër. Na është thënë se ata janë në bisedime edhe me një klub tjetër; ndoshta do të arrijnë marrëveshje atje. Oferta jonë e fundit për Salahun është fjala jonë përfundimtare – një ofertë që nuk cenon identitetin e klubit Beşiktaş”, tha ai.
Özen zbuloi gjithashtu se klubi kishte zhvilluar disa takime me përfaqësuesit e Salahut.
“Gjithçka po shkonte shumë mirë deri në atë pikë. Sapo nisën diskutimet financiare, përparimi i shpejtë që ishte parë në ditën e parë filloi të ngadalësohej pas datës 21 korrik. Filluan të shfaqeshin kërkesa që e bllokonin si rrjedhën e informacionit ashtu edhe aspektin financiar. Besoj se një sportist i respektuar si Salah nuk ishte në dijeni të këtyre gjërave. Klubi ka politikën e vet dhe nuk mund të largohet prej saj. Presidenti ynë e kishte përcaktuar qartë kufirin që nuk do ta kalonte dhe i qëndroi atij vendimi. Menaxhimi është një çështje ligjore; ekziston një normë komisioni e përcaktuar me ligj dhe tejkalimi i saj do të ishte i paligjshëm. Kur bëhet fjalë për Beşiktaşin, shmangia e një situate të tillë është detyrim për çdo tifoz të klubit. Presidenti, duke mos marrë një vendim populist, për momentin është tërhequr nga negociatat”, shtoi ai.
Megjithatë, duket se rivali i Beşiktaşit në Superligën turke, Trabzonspor, po tenton t’ia rrëmbejë transferimin.
Sipas gazetarit të “Foot Mercato”, Santi Aouna, Trabzonspor është pranë arritjes së një marrëveshjeje të plotë me futbollistin pas negociatave me agjentin e tij, gjë që ka bërë që Beşiktaşi të pezullojë bisedimet.
Ndërkohë, gazetari turk Yağız Sabuncuoğlu raporton se Salahu do të përfitojë një pagë prej 17 milionë eurosh në sezon dhe pritet të nënshkruajë një kontratë dyvjeçare.
Trabzonspori e mbylli sezonin e kaluar në vendin e tretë të Superligës turke, pas Galatasarayt dhe Fenerbahçes.
Burimi: 04online
