Sot nis Java Botërore e Imunizimit (24-30 prill) e cila kremtohet çdo vit në javën e fundit të prillit.

Kjo javë synon të promovojë përdorimin e vaksinave për të mbrojtur njerëzit e të gjitha moshave nga sëmundjet.

“Gjatë Javës Botërore të Imunizimit, le t’i tregojmë botës se disa tradita familjare ia vlen të kalohen”, bën thirrje Organizata Botërore e Shëndetësisë. Nën temën “Për çdo brez, vaksinat funksionojnë”, Java Botërore e Imunizimit do të promovojë se si vaksinat kanë mbrojtur në mënyrë të sigurt njerëzit, familjet dhe komunitetet për breza, dhe vazhdojnë të mbrojnë të ardhmen tonë.

Përmes fuqisë së saj organizuese, OBSH punon me vendet anembanë globit për të rritur ndërgjegjësimin për vlerën e vaksinave dhe imunizimit dhe siguron që qeveritë të marrin udhëzimet dhe mbështetjen teknike të nevojshme për të zbatuar programe imunizimi me cilësi të lartë.

Vaksinat kanë qenë prej kohësh një nga mjetet më të fuqishme në shëndetin publik. OBSH thotë se, gjatë 50 viteve të fundit, vaksinat kanë shpëtuar më shumë se 150 milionë jetë dhe jo rastësisht, por sepse njerëzit morën vendimin për të mbrojtur veten, fëmijët e tyre dhe komunitetet e tyre nga sëmundje si fruthi, difteria, poliomeliti dhe rotavirusi.

Sot, vaksinat më të reja kundër malaries, HPV, kolerës, dengos, meningjitit, RSV, ebolës dhe lijes se majmunit po shpëtojnë edhe më shumë jetë dhe po i ndihmojnë njerëzit në çdo fazë të jetës të jetojnë më gjatë dhe më shëndetshëm falë përparimeve shkencore.

Burimi: mesazhi