Të paktën 10 persona janë vrarë në sulme të reja izraelite në jug të Libanit, pavarësisht armëpushimit, njoftoi Ministria e Shëndetësisë e Libanit.

Sipas autoriteteve, gjashtë persona, përfshirë dy shpëtimtarë të organizatës “Risala Scouts” dhe një vajzë siriane, u vranë në fshatin Deir Qanun al-Nahr pranë qytetit të Tyre. Katër shpëtimtarë të tjerë humbën jetën në një sulm të mëhershëm në qytetin Hanaway.

Pamjet e publikuara në rrjetet sociale tregojnë se ekipet e ndihmës po përpiqeshin të shpëtonin të plagosurit, përfshirë një fëmijë, kur zona u godit sërish nga një raketë. Sulmi i dytë ndodhi menjëherë pasi në vendngjarje mbërriti një ambulancë.

Ministria e Shëndetësisë e Libanit e cilësoi ngjarjen si një shkelje të re të armëpushimit. Sipas të dhënave zyrtare, që nga shkurti janë vrarë 3.111 persona në Liban, përfshirë 123 punonjës mjekësorë, më shumë se 210 fëmijë dhe afro 300 gra. /mesazhi

Burimi: mesazhi