José Mourinho do të kërkojë të bëjë ndryshime të mëdha te Real Madrid pas disa sezoneve zhgënjyese në “Bernabéu”, dhe megjithëse ende nuk është zyrtarizuar si trajneri i ri i klubit, ai tashmë ka filluar të ndikojë në merkato. Ai tashmë ka vënë syrin te Rodri Hernández i Manchester City, ndërsa edhe një nga ish-lojtarët e tij mund t’i bashkohet në kryeqytetin spanjoll.

Mourinho dëshiron kontroll të konsiderueshëm mbi planet e transferimeve të Real Madridit gjatë verës, teksa synon ta rikthejë klubin në majat e futbollit. Problemet në dhomat e zhveshjes duhet të zgjidhen dhe priten afrime të reja për të sjellë freski në skuadër, ku një nga emrat e mundshëm është Marcus Rashford.

Mourinho e vlerëson shumë Rashfordin pas periudhës që kaluan së bashku te Manchester United, dhe sipas raportimeve të The Independent (përmes Sport), ai e ka vendosur sulmuesin anglez – aktualisht në huazim te Barcelona – në listën e dëshirave për afatin kalimtar të verës.

Rashford mund të jetë i disponueshëm këtë verë nëse Barcelona nuk arrin marrëveshje të re me Manchester Unitedin. Klubi anglez tashmë u ka bërë të qartë katalanasve se një tjetër huazim nuk do të pranohet, dhe nëse nuk arrihet një transferim përfundimtar, atëherë Real Madridi mund të futet në garë për ta transferuar.

Megjithatë, gjasat janë që Rashford të mbetet te Barcelona në një mënyrë apo tjetër. Hansi Flick i ka bërë të ditur drejtorit sportiv Deco se llogarit në shërbimet e reprezentuesit anglez për sezonin e ardhshëm, prandaj katalanasit do të përpiqen të arrijnë marrëveshje me Manchester Unitedin në javët dhe muajt në vijim.

Do të ishte padyshim një histori e madhe nëse Rashford do të përfundonte te Real Madridi, pasi ai do të ishte një alternativë shumë cilësore për Vinícius Júnior. Megjithatë, për momentin ky transferim duket shumë pak i mundshëm.

Burimi: 04online