Në heshtjen e Sheshit të Kuq, me përshëndetjen e armëve dhe tingujt e bandave ushtarake, në orën 10:00, në Moskë nisi parada për 81-vjetorin e fitores ndaj Gjermanisë naziste në Luftën e Dytë Botërore.

Ceremonia është zhvilluar në një atmosferë më të zbehtë se zakonisht, pothuajse si në kohët e pandemisë së COVID-19, apo edhe më e kufizuar, për shkak të frikës nga një sulm ukrainas.

Kiev ka treguar se mund të godasë në distanca të mëdha me dronë dhe me raketa të reja “Flamingo”, të prodhuara në Ukrainë dhe të afta të mbajnë koka luftarake deri në 1 ton. Megjithatë, siguria e paradës këtë herë është garantuar më shumë nga diplomacia: presidenti amerikan Donald Trump ka shpallur një armëpushim 3-ditor, të cilin e sheh si hap të mundshëm drejt një paqeje më të qëndrueshme pas 50 muajsh luftë.

Sipas raportimeve, presidenti ukrainas Volodymyr Zelensky ka miratuar një vendim që gjatë paradës në Moskë të mos kryhen sulme, duke e paraqitur si një “lëvizje humanitare” në kuadër të negociatave me SHBA-të.

Në Sheshin e Kuq, përpara Kremlinit dhe mauzoleut të Leninit, trupat ushtarake kanë parakaluar pa prezencën e zakonshme të mjeteve të rënda ushtarake si tanke dhe raketahedhëse. Presidenti rus, Vladimir Putin, ka ndjekur ceremoninë nga tribuna kryesore.

Putin ka mbajtur një fjalim ku ka përkujtuar sakrificat e rreth 27 milionë ushtarëve sovjetikë të rënë në Luftën e Dytë Botërore, duke kërkuar një minutë heshtje në nder të tyre. Megjithatë, këtë vit ceremonia ka pasur një pjesëmarrje më të kufizuar të liderëve të huaj.

Në Moskë kanë qenë të pranishëm vetëm disa figura, përfshirë presidentët e Kazakistanit dhe Uzbekistanit, si dhe liderë të Bjellorusisë, Malajzisë, Laosit dhe disa rajoneve të tjera. Ndryshe nga vitet e mëparshme, kur në tribunë ishin edhe liderë të vendeve të NATO-s apo figura të tjera të rëndësishme ndërkombëtare, këtë vit pjesëmarrja ka qenë shumë më e ulët.

Autoritetet ruse nuk kanë dërguar ftesa të gjera për liderët e huaj, duke theksuar se pjesëmarrja ishte e hapur vetëm për ata që dëshironin të vinin.

Për të garantuar sigurinë e presidentit Putin dhe zhvillimin e ceremonisë, në Moskë është kufizuar përkohësisht edhe përdorimi i internetit në celularë dhe aplikacioneve të komunikimit. Armëpushimi i shpallur shihet si i pari i plotë që nga fillimi i luftës në shkurt 2022, megjithëse në vijën e frontit janë raportuar ende përplasje sporadike.

Në fjalimin e tij, Putin ka përmendur shkurtimisht luftën në Ukrainë, duke thënë se forcat ruse “po përballen me një forcë agresive të mbështetur nga NATO”, ndërsa ka theksuar se “heronjtë tanë po përparojnë”.

Parada ka përfunduar me fluturimin e avionëve luftarakë dhe me ceremoninë tradicionale të vendosjes së kurorave pranë Varrit të Ushtarit të Panjohur, një moment simbolik që përmbylli një ngjarje më të kufizuar se në vitet e mëparshme.

Burimi: mesazhi